Alberts nie bang vir uitdaging
2010-04-14 10:12
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Johannesburg - Die Lions sal ’n groot fout begaan as hulle hom Saterdag wil uitsonder vir spesiale aandag, sê die Sharks se Willem Alberts.
“As hulle op my wil fokus, moet hulle net onthou daar is 14 ander ouens wat die skade kan aanrig,” sê dié stewige losvoorspeler oor sy terugkeer na die Leeukuil.
Dit is die eerste keer wat Alberts weer hier in aksie gaan wees ná sy omstrede skuif na Durban. Sy besluit om die Goudstad vir dié vakansiestad te verruil, het ’n kwaai kontraktuele toutrekkery tussen die Lions en Sharks veroorsaak, wat selfs in die hof gedraai het.
“Ek geniet my rugby nou baie by die Sharks en dit is lekker om weer aan die wenkant te wees,” het Alberts gister gesê.
“Ja,” erken hy, “dit was aanvanklik ’n aanpassing, maar ek is nou gevestig en pas goed hier in. Dit was nogal iets om vertroud te raak met die nuwe wedstrydplan wat by die Sharks geld, maar dit was bloot ’n kwessie van tyd voordat dit sou gebeur.
“Wat veral hier uitstaan, is die professionaliteit wat deel is van die hele opset. Dit is werklik ’n voorreg om deel te wees van ’n unie soos hierdie.”
In die eerste paar Super14-wedstryde was Alberts aan die stil kant, maar die laaste paar kragmetings was hy al hoe meer prominent en kom hy meer tot sy reg.
Hy geniet ook die Sharks-leefwyse, hoewel dié oud-leerling van die Hoërskool Monument in Krugersdorp erken die kwaai hitte en humiditeit kry hom nog soms onder.
Het hy nie met die Sharks se swak begin tot die seisoen soms gewonder of hy nie dalk ’n fout gemaak het met sy skuif nie?
“Glad nie, want ’n goeie span word nie sommer oornag ’n swak span nie en ons het geweet die draaipunt moes een of ander tyd kom.”
Om weer in die Leeukuil in aksie te wees, waar hy soveel puik vertonings vir die Leeus gelewer het, is iets waarna hy baie uitsien.
“Dit bly vir my ’n spesiale veld om op te speel en om daar uit te draf, haal die beste uit my,” sê Alberts, wat met Ryan Kankowski se besering in sy gunsteling-posisie, as agtsteman, sal diens doen.
Al gaan Alberts se voormalige spanmaats probeer om sy neus goed in die grond te vryf, is hy reg vir die uitdaging.
Want hoe harder dit raak, hoe meer is hy in sy element
-Sport24