‘Afronding’ in Sydney Lions se wagwoord
2010-03-12 09:15
In-diepte Verslae
Die afrigter van die Sharks, John Plumtree, het sy span aangekondig vir die vriendskaplike wedstryd teen Boland op Kingspark in Durban.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Pieter Jordaan
Johannesburg - Die Lions se Super14-rugbyspan wil vandag doen wat die Sharks verlede week moes gedoen het.
Die Waratahs speel gasheer vir die Lions in Sydney – dieselfde stad waar die Waratahs die skeidsregter Paul Marks verlede week deels moes bedank vir ’n naelskraapse sege oor die Sharks.
Was dit nie daarvoor nie, het die Waratahs teen ’n derde Suid-Afrikaanse teenstander in 2010 verloor nadat hulle op hul Suid-Afrikaanse toer teen die Stormers in Kaapstad en die Bulls op Loftus vasgeval het.
Dié derde Suid-Afrikaanse Super14-oorwinning kan vandag aan die opwindende Lions-span behoort as die Waratahs hul vertoning teen die Sharks herhaal.
Die Lions sal ’n veel meer afgeronde vertoning moet lewer om ná vier nederlae te wen.
Samespel was ’n probleem teen die Stormers, verdediging het hulle teen die Chiefs en die Hurricanes gekniehalter en verlede week teen die Brumbies was dissipline die probleem.
In elke wedstryd het die Lions in minstens een afdeling van hul spel verbeter, maar dan weer in ’n ander afdeling drooggemaak.
Hoewel die Waratahs én die Lions hulle op die aanval wil laat geld, is die kans goed dat die stryd voorlangs beslis sal word.
Byna die ganse Waratahs-beginspan is toetsspelers en onder die agttal is dit net die slot Kane Douglas en flank Dave Dennis wat nog nie ’n spul toetswedstryde op hul kerfstok het nie.
Maar die Lions se lostrio staan in elke wedstryd nog hul man en Todd Clever, Derick Minnie en Cobus Grobbelaar sal nie vir Phil Waugh-hulle terugdeins nie.
Die Lions-lynstaan was goed teen die Brumbies en daar is hoop dat die skrums sal verbeter noudat die Springbok-stut Heinke van der Merwe, Hannes Franklin en Ross Geldenhuys terug in die voorry is.
Die Lions se vierde en vyfde wedstryde op toer is teen die Crusaders en die Highlanders. Vandag is dus straks hul beste kans om ’n toersege in 2010 se reeks te behaal.
Die spanne is:
Waratahs: Sosene Anesi, Lachlan Turner, Tom Carter, Berrick Barnes, Drew Mitchell, Daniel Halangahu, Luke Burgess, Wycliff Palu, Phil Waugh (k), Dave Dennis, Kane Douglas, Dean Mumm, Al Baxter, Tatafu Polota-Nau, Benn Robinson. PLAASVERVANGERS: Daniel Kirkpatrick, Sekope Kepu, Will Caldwell, Ben Mowen, Josh Holmes, Kurtley Beale, Rob Horne.
Lions: Earl Rose, Tonderai Chavhanga, Walter Venter, Doppies la Grange, Wandile Mjekevu, Carlos Spencer, JP Joubert, Todd Clever, Derick Minnie, Cobus Grobbelaar (k), Willem Stoltz, Franco van der Merwe, Ross Geldenhuys, Hannes Franklin, Heinke van der Merwe. PLAASVERVANGERS: Charles Emslie, JC Janse van Rensburg, Jacques Lombard, Robert Kruger, Jano Vermaak, Burton Francis, Wigan Pekeur.
- Sport24