Adi is welkom by die Stormers, sê Allister
2011-11-25 07:00
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Kaapstad – Adrian Jacobs is welkom om op dieselfde grondslag as Burton Francis by die Stormers se vergrote oefengroep aan te sluit.
Dit was die boodskap van die Stormers se afrigter, Allister Coetzee, toe aan hom gevra is of dit die moeite werd is om dié Springbok-senter met die oog op Super-rugby te betrek.
Die 31-jarige Jacobs het Dinsdag na sy geboortestad teruggekeer nadat hy nie ’n nuwe kontrak by die Sharks aangebied is nie. Hy het keuses oorsee, maar wil eers tyd saam met sy gesin deurbring voordat hy oor sy toekoms besin.
“Ek het Woensdagoggend met Adi gesels en vir hom gesê hy kan my skakel sodra hy ingeburger is,” sê Coetzee. “
“Adi is ’n ervare speler, maar ons praat nog nie oor ’n kontrak nie.
“Ons het nog nie van aangesig tot aangesig gesels nie. Maar hy is meer as welkom om by ons aan te sluit.”
Die Stormers sal die Super-veldtog sonder noemenswaardige diepte op senter begin.
Johann Sadie is Bulls toe, Tim Whitehead het hom by die Sharks aangesluit en Jaque Fourie speel tot diep in Maart in Japan.
Jean de Villiers en Juan de Jongh sal ’n skaflike senterpaar wees, maar dit is onervare manne soos JP du Plessis, Michael van der Spuy en Berton Klaasen wat die diepte moet verskaf. Hulle is straks nog in ’n stadium van hul loopbane waar ’n seisoen se Vodacom- en Curriebeker-rugby hulle goed te pas sal kom.
“Adi lyk toenemend soos ’n ou wat sal inpas,” sê Coetzee.
Die Stormers is op losskakel in dieselfde bootjie. Peter Grant moet ook eers verpligtinge in Japan nakom. Gary van Aswegen is verlede jaar op losskakel aan Super-rugby blootgestel en het ten volle van ’n kniebesering herstel.
Demetri Catrakilis het opgang in die Curriebeker-reeks gemaak nadat hy uit klubgeledere betrek is. En dan is daar natuurlik nog Francis en Kurt Coleman.
Die Bolander Elgar Watts kan ook betrek word sodra hy van ’n skouerbesering herstel het.
“Jy kan nooit genoeg losskakels in die Kaap hê nie,” sê Coetzee nadat die Stormers en die Westelike Provinsie vanjaar deur beserings in daardie posisie geteister is.
– Sport24
– Bly op hoogte van al die jongste sportnuus deur Nuus24Sport op Twitter te volg