Adi in Kaap ná Sharks hom pos
2011-11-23 08:00
In-diepte Verslae
Die Highlanders moes 'n laat terugvegpoging deur die Blues afweer om die Super-rugbykragmeting op Eden Park in Auckland te wen.
Die haker van die Lions, Bandise Maku, het 'n ernstige skouerbesering opgedoen en sal 'n groot deel van die Super-rugbyreeks misloop.
Stephen Nell en Christo Buchner
Kaapstad. – Burton Francis oefen saam met die Stormers om hulle van sy deugde te oortuig en Adrian Jacobs sal self nie omgee om aanstaande jaar vir dié Kaapse rugbyspan te speel nie.
Francis se agent, Anthony Johnson, het Dinsdag aan Sport24 bevestig dat die belowende losskakel nie by die Lions sal aanbly nie.
“Burton veg om ’n plek in die Stormers se groep. Hy is tans deel van hul vergrote oefengroep,” het Johnson gesê.
Intussen het Jacobs se verbintenis van ’n dekade met Sharks-rugby tot ’n einde gekom.
Jacobs is nie vir die komende seisoen ’n kontrak aangebied nie. Hy was Dinsdag op pad Kaap toe en het gesê dat hy ’n geleentheid by Stormers sal oorweeg indien dit hom voordoen.
“Die Kaap is my huis en ek sal nie sommer nee kan sê as die Stormers in my belang stel nie,” het Jacobs gesê.
“Ek het met die Boland gepraat, maar nog nie weer van hulle gehoor nie.”
Jacobs (31) se prioriteit is egter vir eers om tyd met sy gesin deur te bring. Hy het ’n dogter van 11 en ’n seun van 7.
Met Jaque Fourie saam met Peter Grant in Japan, behoort Jean de Villiers en Juan de Jongh die nuwe seisoen as die Stormers se senterpaar te begin.
Francis en Jacobs kan nuttig wees om diepte te verskaf omdat daar onsekerheid is oor presies wanneer Fourie en Grant gaan terugkeer. Die seisoen in Japan strek tot in Maart.
Jacobs het sy buiging vir die Durbaniete in 2001 gemaak en uiteindelik ook 28 keer vir die Springbokke uitgedraf.
Hy was die afgelope twee seisoene gefrustreerd omdat hy meestal op die plaasvervangersbank gekies is.
Die afgelope seisoen is Stefan Terblanche, Meyer Bosman en Marius Joubert bo hom verkies, hoewel hy die kere dat hy wel as plaasvervanger gespeel het, dikwels die slaankrag verleen het wat andersins afwesig was.
Die vier senters in die Sharks se Super Rugby-oefengroep vir die nuwe seisoen is Bosman, Joubert, die oud-Kapenaar Tim Whitehead en Paul Jordaan, wat goeie spel vir die Haaie se o.21-span gelewer het.
Indien die Stormers in Francis se dienste belang stel, sal hy met ander aanspraakmakers soos Gary van Aswegen, Demetri Catrakilis, Kurt Coleman en Elgar Watts vir die nr.10-trui meeding.
Grant was die afgelope seisoen die Stormers se eerste keuse op losskakel nadat hy van sy verpligtinge by die Kobelco Steelers in Japan teruggekeer het.
Van Aswegen het baie belofte getoon, maar is op kritieke tye deur beserings geteister. Die Stormers moes ook noodgedwonge vir Lionel Cronjé en Coleman inspan. Die nood het op ’n tydstip tot só ’n mate gedruk dat die skrumskakel Dewaldt Duvenage sy lyf nr.10 moes hou.
Intussen is daar verskeie jong spelers in die Sharks se oefengroep.
Een van hulle is die slot Pieter-Steph du Toit, ’n voormalige Bolander wat die afgelope seisoen die Haaie se o.19-speler van die jaar was.
Hy het só in die junior geledere beïndruk dat hy dadelik by die hardebaarde betrek is.
Die voormalige Suid-Afrikaanse sewesspeler Tera Mtembu is een van die losvoorspelers in die groep.
Die belowende skrumskakel Cobus Reinach, asook die heelagter Gouws Prinsloo, oefen ook saam met die Sharks.
Vir die jongste sportnuus volg Nuus24Sport op Twitter.
– Sport24