Zim deporteer sokkerafrigter
2010-10-06 13:46
Harare - Die nuut aangestelde afrigter van Zimbabwe se nasionale sokkerspan, Tom Sainfiet, is Dinsdag deur emigrasiebeamptes beveel om die land te verlaat aangesien hy nie oor 'n werksvisum beskik nie, het staatsmedia berig.
"Ons het hom beveel om die land te verlaat terwyl sy aansoek afgehandel word," het 'n beampte, Evans Siziba, aan die Herald-staatskoerant gesê.
"Hy het met die landswette gepeuter en is gedeporteer," het Siziba bygevoeg.
Die 37-jarige Belgiër, wat verlede maand as Zimbabwe se sokkerafrigter aangestel is, kan dalk nou Sondag se kwalifiseringswedstryd vir die 2012 Afrikabeker teen Kaap Verde misloop.
Die aanstelling van Saintfiet, wat voorheen die Namibiese span afgerig het, is verantwoordelik vir groot spanning tussen amptenare binne Zimbabwe se sokkerbeheerliggaam.
Onlangse berigte in die media het ook aangedui dat die Namibiese sokkerfederasie regstappe teen Zimbabwe oorweeg omdat hulle die afrigter sonder toestemming genader het.
Bly op hoogte van al die jongste sportnuus deur Nuus24Sport op Twitter te volg.
- Sport24