Beamptes vernietig versamelaar se WB-sokkerhemp
2011-02-10 13:27
Parys - Die hemp van die sokkerspeler David Trezeguet, wat deel was van Frankryk se 1998 Wêreldbeker-wenspan, is deur doeane-beamptes vernietig nadat hulle verkeerdelik gedink het dat dit 'n vervalsing is, het 'n versamelaar Woensdag gesê.
Oliver Demolis het die sokkerhemp op die internet by 'n Brasiliaanse versamelaar vir €7 350 (sowat R72 000) gekoop en probeer die geld nou met die hulp van die Franse regstelsel terugkry.
"Die man by wie ek die hemp gekoop het was 'n bekende versamelaar en die hemp was amptelik. Dit was die laaste stuk in my versameling," het Demolis aan die Le Dauphine koerant gesê.
"Toe ek gaan om die hemp by die doeane te gaan optel het hulle vir my gesê die hemp is vernietig omdat dit 'n vervalsing is. Ek het van my kop af geraak," het die Fransman gesê.
Frankryk het Brasilië 3-0 in die 1998 Wêreldbeker-eindstryd by die Stade de France geklop. Trezeguet was 'n reserwe en is nie as plaasvervanger in die wedstyd gebruik nie.
Bly op hoogte van al die jongste sportnuus deur Nuus24Sport op Twitter te volg.
- Sport24