United seëvier; ander bra bekaf
2011-08-15 07:27
Londen. – Ná die eerste naweek van die nuwe Engelse sokkerseisoen is daar nie juis baie om oor huis toe te skryf nie.
Dit is nou tensy jy ’n ondersteuner van die verdedigende kampioen, Manchester United, is. United het West Brom met 2-1 geklop.
Wayne Rooney het die eerste doel van die wedstryd aangeteken, maar West Brom het sake gelyk gemaak toe Shane Long die agterkant van die net gevind het ná ’n reuse-blaps deur die United-doelwagter, David de Gea.
’n Eie doel deur Steven Reid het egter die sege vir United beklink.
Dit was grotendeels ’n frustrerende tyd vir die ander titel-aanspraakmakers.
Chelsea se poging om sy nuwe afrigter, Andre Villas-Boas, ’n sege in sy eerste wedstryd te gee, was nie geslaagd nie weens ongelooflike werk in die doelhok deur Stoke City se doelwagter, Asmir Begovic.
Ná ’n stil eerste helfte het die Blues met meer vuur gespeel en die doelskieter Fernando Torres was die skepper van die meeste van die aanvallende bewegings. Torres het die eerste keer weer met selfvertroue gespeel en herinner aan die speler wat hy was toe hy nog ’n faktor by Liverpool was.
Liverpool en Arsenal het ook hul seisoen met teleurstellende gelykop-uitslae begin.
Nóg Cesc Fabregas nóg Samir Nasri was in Arsenal se groep. Die Gunners en Newcastle United het ook die louere in ’n doellose wedstryd gedeel.
Met Fabregas skynbaar op pad na Barcelona en Nasri, wat nie gekies is nie oor die gerugte oor sy aansluiting by Manchester City, was dit ’n maar ’n yl Gunners-aanval. Met drie minute oor het Theo Walcott amper die wendoel aangeteken, maar sy poging was nie goed genoeg nie.
Op sy beurt het Liverpool ’n voorsprong teen Sunderland geneem danksy ’n strafdoel deur Luis Suarez.
Dié Uruguay-doelskieter het egter ook ’n strafskop gemis, waarna Sebastian Larsson in die 57ste minuut die gelykmakende doel aangeteken het.
“As ek terugkyk na die wedstryd sal ek sê ’n gelykop-uitslag vertel die hele storie,” het Liverpool se afrigter, Kenny Dalglish, gesê.
Queens Park Rangers het in sy eerste wedstryd terug in die Premierliga ná ’n afwesigheid van 15 jaar met 0-4 teen Bolton verloor.
Vir die jongste sportnuus volg Nuus24Sport op Twitter.
– Sport24