Steven kan tog vir Bafana uitdraf
2011-09-28 08:17
Steven Pienaar is nie gister in Bafana Bafana se groep ingesluit nie, maar die Suid-Afrikaanse sokkerkaptein kan steeds in die beslissende kwalifiserende wedstryd vir die Afrikabeker-toernooi betrek word.
Sy moontlike terugkeer vir Tottenham Hotspur kan bepaal of hy op 8 Oktober in Nelspruit vir Bafana teen Sierra Leone ingespan gaan word.
As Egipte Niger klop, benodig Suid-Afrika net ’n gelykop-uitslag om sy plek in aanstaande jaar se Afrikabeker-toernooi te bespreek.
Pienaar was lank laas in aksie en die Suid-Afrikaanse afrigter, Pitso Mosimane, sal mooi moet besin.
Pienaar het aan die begin van die Engelse seisoen ’n liesoperasie ondergaan. Hy het albei Suid-Afrika se kwalifiserende wedstryde in die tweede ronde teen Egipte en Niger misgeloop. Hy is intussen in die lig van ’n string beserings gevra om hom gereed te hou.
Mosimane en sy bestuurspan was in verbinding met Pienaar en sal hom weer kontak as hy intussen tot die spel terugkeer. Tottenham speel môre teen Shamrock Rovers en Sondag teen Arsenal.
Die middelveldspeler Reneilwe Letsholonyane van Kaizer Chiefs en Mamelodi Sundowns se skerpskutter Katlego Mphela is ná beserings weer beskikbaar. Letsholonyane is aan die begin van die seisoen beseer, terwyl Mphela die vorige wedstryd teen Niger weens ’n kniebesering misgeloop het.
Die middelveldspeler Lebohang Mokoena en die verdediger van Mamelodi Sundowns Punch Masinamela is weer ingesluit. Die enigste nuweling in die groep is die doelskieter Bradley Grobler, wat deesdae sy klubsokker in Turkye vir Goztepe Izmir speel.
Suid-Afrika is steeds sonder Crystal Palace se Kagisho Dikgacoi, terwyl Tlou Segolela (Orlando Pirates), Teko Modise (Mamelodi Sundowns), Tsepo Masilela (Getafe) en Davide Somma (Leeds United) ook nog van beserings herstel.
Pienaar is oor die afwesigheid van dié handvol beseerdes genader. Siphiwe Tshabalala sal weer as kaptein waarneem as Pienaar nie speel nie.
Mosimane-hulle hou natuurlik ook asem op dat daar nie nog beserings in vandag se Premiersokkerliga opduik nie.
Die breier het weer beklemtoon dat hulle hul laaste groepwedstryd teen elke prys móét wen. Hy meen omdat dit ’n tuiswedstryd is, sal dit nie ’n probleem wees nie. “Ons moet weer met aanvallende spel vorendag kom soos wat ons altyd by die huis doen.
“As ons doen wat ons die afgelope jaar gedoen het, behoort ons die maksimum punte te kry.
“Ons is egter in ’n situasie waar ons van ander afhanklik is om deur te kom.”
Dit blyk Suid-Afrika moenie enige gunste van Egipte verwag nie.
Suid-Afrika het ná sy vyf groepwedstryde een punt minder as Niger se nege punte. Sierra Leone is derde van die vier spanne, ook met agt punte. Egipte, met slegs twee punte, gaan luidens berigte glo sy o.23-span in sy laaste wedstryd teen Niger inspan.
Die Bafana-groep is:
Doelwagters: Itumeleng Khune (Kaizer Chiefs), Wayne Sandilands (Mamelodi Sundowns).
Verdedigers: Happy Jele, Siyabonga Sangweni (albei Orlando Pirates), Morgan Gould (Supersport United), Eric Mathoho (Bloemfontein Celtic), Siboniso Gaxa (Lierse), Bongani Khumalo (Tottenham), Anele Ngcongca (Genk), Punch Masenamela (Mamelodi Sundowns).
Middelveldspelers: Andile Jali, Oupa Manyisa (albei Orlando Pirates), Hlompho Kekana, Lebohang Mokoena (albei Mamelodi Sundowns), Reneilwe Letsholonyane, Siphiwe Tshabalala (albei Kaizer Chiefs), Daylon Claasen (Lierse), Thanduyise Khuboni (Arrows).
Doelskieters: Lehlohonolo Majoro, Bernard Parker (albei Kaizer Chiefs), Bradley Grobler (Goztepe Izmir), Katlego Mphela (Mamelodi Sundowns), Thulani Serero (Ajax Amsterdam)
Vir die jongste sportnuus volg Nuus24Sport op Twitter.
– Sport24