Spanje breek Portugese harte

2012-06-28 07:31

Malherbe Pelser

Kaapstad – Spanje het Woensdagaand 4-2 op strafdoele teen Portugal in die eerste halfeindstryd van die Euro-sokkertoernooi in Donetsk in die Oekraïne gewen.

Die wedstryd het 0-0 geeïndig ná die eerste 90 minute en is toe gevolg deur 30 minute van ekstra tyd.

Cesc Fabregas van Barcelona het die laaste strafdoel vir Spanje aangeteken ná die Portugese hulself in die voet geskiet het deur swak kommunikasie tydens die strafdoele.

Met die tellings gelyk voor die derde strafdoel het Bruno Alves nadergestap om sy strafdoel te neem toe sy spanmaat Nani hom terugstuur sodat hy eerder self een kon neem. Nani het sy strafdoel soos 'n kanonskoot in die net ingeskiet en Sergio Ramos het toe vir die Spanjaarde getref.

Daarna het Alves uiteindelik sy kans gekry, maar mens kon aan sy lyftaal en met al die verwarring van 'n myl af sien dat hy tien teen een nie sy doel sou aanteken nie.

Alves het gemis toe hy die bal teen die lat vasgeskop het.

Ronaldo was oënskynlik veronderstel om Portugal se vyfde strafdoel te neem en sodoende moontlik sy oomblik van glorie op internasionale vlak te geniet, maar met Alves se mis en Fabregas se daaropvolgende-doel het hy nie eers die kans gekry om voor die doelhok aan te tree nie.

Die fantastiese Fábio Coentrão het die Portugese verdediging uitsonderlik gelei en hy kan ongelukkig voel dat 120 minute se harde werk en verdediging ongedaan gemaak is deur swak beplanning.

Ondersteuners van albei spanne was gefrustreerd deur beide spanne se onvermoë om hulle kanse te neem tydens normale speeltyd sowel as ekstra tyd.

Voor die afskop was alle oë op die Portugese kaptein en Real Madrid-superster Ronaldo gerig. Hy is die een speler wat die verskil vir Portugal kon maak en het verskeie kanse gehad, maar het elke keer te hoog of te wyd geskop.

Spanje het verras deur Álvaro Negredo in plaas van Chelsea se Fernando Torres van die begin af te speel. Die taktiek het nie gewerk nie en dit wou voorkom asof Spanje se enigste mikpunt vir die grootste deel van die wedstryd was om die bal te hou. Negredo het feitlik niks van die bal gesien nie en het dus min kans gehad om 'n impak op die wedstryd te hê.

Sake is egter omgeswaai deur drie plaasvervangers: Cesc Fabregas het opgekom vir die oneffektiewe Negredo en Pedro Rodríguez en Jesús Navas is ook ingebring om 'n verskil te maak.

Die drie plaasvervangers moes Portugal lank voor die strafdoele reeds gebêre het, maar kon keer op keer net nie die nodige aangee of doelpoging vermag nie.

Spanje speel eerskomende Sondag in die eindstryd teen die wenner van Donderdagaand se stryd tussen Italië en Duitsland in Warskau.

Vir die jongste sportnuus volg Nuus24Sport op Twitter.

– Nuus24