Sokkerwêreld sien nét rooi
2010-12-26 13:05
Net meer as ses jaar nadat Sepp Blatter dáái koevert in Zürich oopgemaak het, het die eerste fluitjie van WB2010 op Soccer City geblaas.
Altesaam 64 wedstryde en ’n rekord-lae 145 doele later het wêreldsokker ’n nuwe kampioen gekroon – die agtste in 19 toernooie.
Duitsland, Nederland en Uruguay het elk ’n sterk aanspraak gemaak op dié titel, tog was dit Spanje wat op 11 Julie in die ‘Kalbas’ hul eerste beker-glorie gehad het nadat die manjifieke middelveldspeler Andres Iniesta ’n rateltaai eindstryd teen die fisieke Nederlanders laat in bykomende speeltyd met sy regtervoet beslis het.
Die Spanjaarde het boonop die eerste Europese land tot nóg toe geword om dié trofee buite hul eie vasteland te wen, die eerste om te seëvier nadat hy sy openingswedstryd verloor het – én die span wat die minste doele afgestaan (2) én aangeteken het (8).
Op papier was die vertoning van die Suid-Afrikaners dalk nóg ’n laagtepunt.
En ... tog het Bafana Bafana die nasie verenig soos laas in 1995 met Francois Pienaar se seëvierende Wêreldbeker-Bokke ervaar is.
Carlos Alberto Parreira se span het weliswaar die eerste gasheerland nóg geword om nie die tweede ronde te haal nie, maar dit was so hittete of die Suid-Afrikaners het dié valbyl op uiters dramatiese wyse vrygespring.
Aanhangers sal boonop nog lank praat oor Siphiwe Tshabalala se spogdoel in die openingswedstryd teen Mexiko, maar dit was in Bloemfontein waar Bafana die verbeelding van die ganse sokkerwêreld aangegryp het deur die voormalige wêreldkampioen Frankryk met 2-1 ore aan te sit.
Ghana het Afrika se vlam die helderste laat skyn en was die enigste span van die vasteland om die kwarteindronde te haal, voordat hulle op hartverskeurende wyse uit dié toernooi geboender is toe die Uruguaanse doelskieter Luis Suarez hulle van ’n wendoel ontneem het deur die bal met sy hand uit die doelhok te klap.
Suarez was nie die enigste WB-boef nie.
Twee liederlike skeidsregterblapse het bygedra tot Engeland en Mexiko se uittog, terwyl Nederland die eindstryd van sy skouspel-status ontneem het deur nege van die 14 geelkaarte én ’n rooikaart te ontvang – ’n nuwe eindstryd-rekord.
Pitso Mosimane, Parreira se jarelange strooijonker, het kort ná die toernooi bruidegom geword en sy stempel onmiddellik afgedruk deur die Black Stars in ’n oefenwedstryd met 1-0 te klop.
Hy het die Suid-Afrikaners daarna ook na ’n sege en ’n gelykopuitslag teen onderskeidelik Niger en Sierra Leone in kwalifiserende wedstryde vir 2012 se Afrika-beker-toernooi gelei, voordat hy laasmaand in Kaapstad teen die taai span van die VSA vasgeval het.
Bafana is boonop bo-aan hul Afrika-beker-groep – en hulle het onlangs vir die eerste keer in byna vyf jaar weer onder die voorste 50 spanne getel op die amptelike wêreldranglys van Fifa.