Sokkerster rybewys kwyt vir dronkbestuur
2010-03-09 18:08
Johannesburg - Bafana Bafana-speler Steven Pienaar is sy rybewys kwyt, en R11 000 armer, ná hy skuldig gepleit het op 'n aanklag van dronkbestuur.
Pienaar, wat vir die Engelse klub Everton speel, kan vir die volgende 12 maande nie in die Verenigde Koninkryk bestuur nie.
Hy is £1 000 (sowat R11 000) beboet omdat hy 'n verkeersteken verontagsaam het.
Volgens berigte was die Suid-Afrikaanse middelveldspeler twee keer oor die alkohollimiet toe hy in die vroeë oggendure op 21 Februarie afgetrek is.
Everton het die betrokke aand 'n oorwinning van 3-1 oor Manchester United behaal in die Engelse Premierliga.
Pienaar kan drie maande van sy vonnis afsny as hy 'n kursus oor alkoholbewustheid doen voor 7 Oktober.
"Dis ok," het Pienaar aan KickOff.com gesê. "Dis deel van die lewe. 'n Mens leer uit hierdie dinge uit."
Mzansi Football, KickOff.com