Sokkerspeler beboet ná hy weier om hand te skud
2011-04-19 10:59
Beijing - 'n Chinese sokkerklub het 'n Brasiliaanse speler, Renato Adriano Jaco Morais, beboet en hom vir drie wedstryde geskors omdat hy geweier het om respek te betoon teenoor sy afrigter en die klub se ondersteuners.
Die Guangzhou Hengda-klub het Dinsdag bevestig dat Renato gestraf is omdat hy geweier het om sy afrigter se hand te skud en omdat hy geweier het om met ondersteuners te praat ná hy vroeër in sy span se wedstryd teen die Beijing Guo'an-klub met 'n ander speler vervang is.
Ongeveer 14 000 euro's (meer as R130 000) sal van Rento se salaris afgetrek word, en hy sal ook met 'n verdere 32 000 euro's (sowat R312 000) beboet word.
Hengda het Renato van die Brasiliaanse klub Botafogo oorgekoop vir 'n periode van vier jaar.
- Volg Nuus24Sport op Twitter.
- Sapa - AP