Sir Alex weer in die sop
2011-05-13 15:01
Londen - Die Manchester United-afrigter Alex Ferguson is Vrydag van ontoelaatbare gedra aangekla nadat hy onlangs vir 'n soortgelyke oortreding geskors is.
"Manchester United se afrigter, Alex Ferguson, word aangekla van ontoelaatbare gedrag wat spruit uit uitlatings wat hy oor die skeidsregter Howard Webb op 6 Mei gemaak het," het die Engelse sokkervereniging (FA) Vrydag in 'n verklaring gesê.
Ferguson het Webb as "eenvoudig die beste skeidsregter" beskryf voor Sondag se Premierliga-wedstryd tussen Man United en Chelsea.
Howard was die wedstryd-skeidsregter en United het die kragmeting gewen.
Die FA se sterk standpunt teenoor Ferguson is deel van 'n respek-veldtog om afrigters te verhoed om enigsins oor skeidsregters voor of na 'n wedstryd te praat.
Ferguson is vir vyf wedstryde in Maart geskors nadat hy gesê het, hy "vrees die ergste" toe Martin Atkinson as skeidsregter vir een van United se wedstryde gekies is.
Vir die jongste sportnuus volg Nuus24Sport op Twitter.
- Sport24