Senuwees lol, sê Bafana-groentjie
2010-09-01 08:48
Johannesburg - 'n Skrale maand gelede het hy nog die handtekeninge van Steven Pienaar, MacBeth Sibaya en Aaron Mokoena gejag.
Die naweek is ’n Bafana Bafana-buiging én drie punte nader aan ’n plek in 2012 se Afrikabeker-toernooi die enigste ding in Keagan Richie se visier.
Dít boonop saam met dieselfde drie spelers, wat dié 20-jarige verdediger van Moroka Swallows steeds as sy helde beskou.
Richie is die enigste nuweling in die Suid-Afrikaanse sokkerafrigter, Pitso Mosimane, se groep vir Bafana se eerste kwalifiserende wedstryd, wat Saterdag in die Mbombela-stadion in Nelspruit plaasvind.
“Ek was maar lekker op my senuwees toe ek hoor ek is gekies, want skielik is ek in dieselfde span as al my helde,” het Richie gister gesê.
“’n Maand terug het ek nog al hul handtekeninge probeer kry en nou is ek een van hulle.”
Tog sal hy nie oorweldig wees nie, sou hy speelkans teen die Wes-Afrikane kry.
“Ek wil nou veg vir ’n permanente plek in die groep en die afrigter se vertroue in my regverdig,” het hy gesê.
“Gelukkig is daar ’n hele klomp ouens by wie ek kan gaan raad vra – soos Steven, MacBeth en Aaron.”
Volgens Sibaya, wat pas sy Russiese klubspan, Rubin Kazan, gehelp het om te kwalifiseer vir die Europese Kampioeneliga, sien hy uit na die kans om Bafana-jongelinge – soos Richie – touwys te maak.
“Toe ek die eerste keer vir Suid-Afrika gekies is, kon ek leer by spelers soos Lucas Radebe en Benni McCarthy en nou wil ek ook help dat die nuwelinge hulle stempels afdruk, ” het dié 32-jarige trots van die middelveld gesê.
Bafana kon, onder die Brasiliaanse breier Joel Santana, nie ’n plek in vanjaar se toernooi in Angola verseker nie.
“Ons het ons les geleer,” het Sibaya gesê.
“Dié keer kan ons geen wedstryd as vanselfsprekend aanvaar nie en ons móét ons stempel reeds vroeg afdruk teen Niger.”
Bly op hoogte van al die jongste sportnuus deur Nuus24Sport op Twitter te volg.
- Sport24