Safa soek nuwe baas nadat Sedibe tasse pak
2011-02-02 08:42
Johannesburg. – Suid-Afrika is sy sokkerbaas kwyt nadat Leslie Sedibe Dinsdag as uitvoerende hoof van die Suid-Afrikaanse Sokkervereniging (Safa) bedank het.
Dié prokureur is begin verlede jaar as Raymond Hack se opvolger aangestel, maar was die laaste paar maande deurgaans met verskeie van Safa se senior bestuurslede haaks.
Hoewel sy kontrak eers Sondag verstryk het, het Sedibe reeds in Oktober gedreig om sy tasse te pak.
“Ons wil hom (Sedibe) bedank dat hy bereid was om tot einde Januarie aan te bly en ons wens hom voorspoed vir die toekoms toe,” het Kirsten Nematandani, Safa-president, Dinsdag gesê.
Volgens hom word daar reeds van Dinsdag af na Sedibe se plaasvervanger gesoek.
“Ons eerste prioriteit is om nou te verseker dat dié aanstelling so gou moontlik gedoen word.
”Intussen sal Pinky Lehoko en Gronie Hluyo, onderskeidelik Safa se direkteur van internasionale sake en direkteur van finansies, gesamentlik in dié pos waarneem.
Vir die jongste sportnuus volg Nuus24Sport op Twitter.
- Sport24