Safa nog stil oor naam
2011-04-12 22:23
Johannesburg - Die Suid-Afrikaanse Voetbalvereniging (Safa) het Dinsdag gehou by hul weiering om te bevestig of die nasionale sokkerspan se naam gaan verander.
Die maatskappy wat die regte besit om die Bafana Bafana-handelsmerk op klerasie en skoeisel te gebruik, Stanton Woodrush, het vroeër vandeesweek gesê Safa het hom ingelig die amptelike bynaam sal verander.
Kirsten Nematandani, Safa-president, het egter gesê die vereniging het nooit praatjies met Wayne Smidt, eienaar van Stanton Woodrush, gehad nie omdat dié glo nooit sy telefoon geantwoord het of op boodskappe gereageer het nie.
“Toe ons sy kontaknommer gekry het, het ons hom gebel, maar sy telefoon was af. Hy het nooit gereageer op die boodskappe wat ons vir hom gelos het nie,” het Nematendani gesê.
Nematendani was nie bereid om te bevestig of Safa sou oorweeg om die regte by Smidt oor te koop en of Safa ‘n geheel en al nuwe naam sal vind nie.
Hy het gesê die vereniging sou Dinsdag ‘n verklaring vrystel, maar Safa se mediabeampte, Matlhomola Morake, wat die verklaring sou uitstuur, het gesê hy weet niks daarvan nie.
Die minister van sport, Fikile Mbalula, ondersteun die idee dat die naam Bafana Bafana moet plek maak vir ‘n meer “intimiderende” kommersiële bynaam. Die huidige naam, Bafana Bafana, beteken “die seuns” in Zulu.
“Naamsverandering is ‘n debat waarna ons kan kyk. Ons word gerespekteer op die Afrika-kontinent,” het Mbalula verlede maand gesê.
“Ons klim die Fifa-ranglys en ek wonder of ons nog steeds daardie naam (Bafana Bafana) nodig het.”
Die idee word ook ondersteun deur Safa se adjunkpresident en uitvoerende hoof van die 2010-Wêreldbeker se organiseringskomitee, Danny Jordaan. Hy, Nematendani en Alpha Mchunu is luidens berigte die taak opgelê om ‘n nuwe naam te vind.
“Zimbabwe is van Rhodesië verander en selfs my tuisstad, Port Elizabeth, staan nou bekend as Nelson Mandelabaai,” het Jordaan onlangs gesê.
“Vir so lank as wat die naam Bafana Bafana al bestaan, was daar dié wat daarteen gekant was. Dit word in sommige opsigte as neerhalend beskou, omdat dit ‘die seuns’ beteken en dit volwasse mans is van wie ons praat.”
- Vir die jongste sportnuus, volg Nuus24Sport op Twitter
- SAPA