Safa bloos oor stryd wat nooit was
2011-02-04 09:47
Johannesburg - Die Suid-Afrikaanse Sokkervereniging (Safa) moes Donderdag ongemaklike vrae beantwoord oor sy organisasievermoë op ’n mediakonferensie wat belê is om ’n aankondiging oor Bafana Bafana te doen.
Die nasionale sokkerspan was veronderstel om Woensdag in die Royal Bafokeng-stadion in Rustenburg in ’n vriendskaplike wedstryd teen Burkina Faso te speel. Maar dit het aan die lig gekom dat dié bepaling nooit gefinaliseer is nie.
Safa het intussen aangekondig dat Bafana nou teen Kenia te staan gaan kom.
Kirsten Nematandani, Safa se president, het gister by Safa-huis in Soweto kleigetrap toe hy aanvanklik gesê het dit was slegs bespiegelings dat Bafana teen Burkina Faso sou speel en dat daar nooit ’n amptelike Safa-aankondiging oor dié wedstryd gedoen is nie.
’n Joernalis het hom egter daarop gewys dat die bepaling op die internasionale sokkerfederasie, Fifa, se amptelike wedstrydlys is.
Bafana pak Kenia nou Woensdag sonder twee van sy grootste name nadat Pitso Mosimane, die span se breier, Katlego Mphela en Teko Modise gepos het.
En hoewel Steven Pienaar, Bafana se blinkste internasionale ster, wel in die groep ingesluit is, lyk dit bra onwaarskynlik dat hy in Rustenburg in aksie sal wees.Dié middelveldspeler het Dinsdag harsingskudding opgedoen toe hy en sy Suid-Afrikaanse spanmaat Bhongani Khumalo in ’n oefening van Tottenham Hotspur koppe gestamp het.
* Die groep teen Kenia is: Itumeleng Khune, Moeneeb Josephs, Morgan Gould, Siboniso Gaxa, Bhongani Khumalo, Tom Mzivukile, Reuben Coete, Anele Ngcongca, Siyabonga Sangweni, Aaron Mokoena, Matthew Pattison, Andile Jali, Thanduyise Khuboni, Reneilwe Letsholonyane, Steven Pienaar, Daylon Claasen, Kagisho Dikgacoi, Siphiwe Tshabalala, Sifiso Myeni, Kermit Erasmus, Tlou Segogela, Bernard Parker, Davide Somma en Thulani Serrero.
Bly op hoogte van al die jongste sportnuus deur Nuus24Sport op Twitter te volg.
- Sport24