Safa betaal R5 milj. vir Bafana-naam
2011-06-24 13:46
Johannesburg - Die Suid-Afrikaanse sokkervereniging (Safa) het ingestem om R5 miljoen vir die Bafana Bafana-handelsmerk te betaal.
Na ‘n 18 jaar lange oorlog met Stanton Woodrush Beperk, die maatskappy wat die Bafana-naam besit, het Safa Vrydag aangekondig dat dit die naamregte sal koop.
Safa, wat dit vroeër oorweeg het om ‘n nuwe naam vir die nasionale span te kry, het gesê ‘n bedrag van R5 miljoen sal oor ‘n tydperk van 12 maande betaal word.
Die minister van sport Fikile Mbalula het destyds sy gewig agter die voorstel om die span se naam te verander gegooi.
Mbalula het gesê die span het ‘n sterker naam as Bafana Bafana, wat “die seuns” in Zoeloe beteken, nodig.
Safa het in Maart vanjaar ‘n komitee bestaande uit die president Kirsten Nematendani, onder-president Danny Jordaan en uitvoerende lid Alpha Mchunu, saamgestel om ‘n moontlike naamsverandering te ondersoek.
Vir die jongste sportnuus volg Nuus24Sport op Twitter.
– Sport24
- SAPA