SAners betaal minder vir WB-kaartjies
2010-02-19 13:34
Johannesburg - Jerome Valcke, sekretaris-generaal van Fifa, sê kaartjiepryse vir Suid-Afrikaners gaan verlaag word om te verseker dat kaartjies vir die Wêreldbeker-eindstryd uitverkoop is.
Ná teleurstellende verkope aan oorsese ondersteuners gaan kategorie 2- en - 3-kaartjies verander word na kategorie 4-sitplekke wat vir $20 (sowat R153) aan Suid-Afrikaners verkoop gaan word.
Valcke het aan The Telegraph gesê: "Ons gaan die aantal kategorie 4-kaartjies meer maak. Ons kan nie 'n situasie hê waar die Wêreldbeker in Suid-Afrika gehou word en die mense nie die wedstryde kan sien nie".
"Dit gaan Fifa se inkomste verminder, maar ons het die inkomste ingebring wat ons nodig het om die reëlingskomitee se begroting van $423 miljoen (sowat R3,2 miljard) te ewenaar."
Valcke glo lugrederye en reismaatskappye is verantwoordelik vir die aantal kaartjies wat nie verkoop is nie.
"Ek dink maatskappye voel hulle kan nou hul koste verhoog. Ons wil seker maak aanhangers kan na Suid-Afrika reis."
"Dit is duidelik dat mense besluit het om die hoogste pryse te vra omdat dit die Wêreldbeker is om hul inkomste te verhoog, maar dit werk nie," het hy gesê.
Valcke het erken dat dit 'n fout was om Match, die agentskap wat verblyf vir Fifa hanteer, eksklusiewe regte te gee om reis- en kaartjiepakette vir Suid-Afrika en Brasilië in 2014 te verkoop.
"Ons het goeie lesse wat ons van 2010 leer wat ons in 2014 gaan help," het hy gesê.
"Vir die 2010 Wêreldbeker moet ons die kaartjies direk aan aanhangers verkoop. Ons sal daaraan dink om Fifa-kaartjiesentrum wêreldwyd oop te maak."
– Sport24