SA doelvraat droom groot
2010-04-06 14:07
Johannesburg - Bafana Bafana sal níé lammers wees wat ter slagting gelei word nie wanneer hulle Mexiko oor net langer as twee maande in die eerste wedstryd van WB 2010 in die Soccer City-stadion pak, sê Siphiwe Tshabalala.
Dié Suid-Afrikaanse middelveld-buks was vól vertroue dat sy span in Junie geskiedenis kan maak deur die eerste keer in drie probeerslae die tweede ronde van sokker se grootste skouspel te haal.
“Ons pak dinge net een wedstryd op ’n slag, maar ons glo dat ons die uitklopronde sal haal,” het Tshabalala aan Sport24 gesê kort ná die Suid-Afrikaanse span se terugkeer vanuit Brasilië.
“Dít sal reeds ’n oorwinning vir die span wees en daarna is enigiets moontlik, mits ons kan voortbou op dít wat ons in Brasilië geleer het.”
Tshabalala en sy spanmaats het Maandag ’n louwarm verwelkoming op die OR Tambo-lughawe ontvang ná die eerste van drie oefenkampe.
Die Bafana-spelers vertrek aanstaande week na Duitsland, voordat hulle hul voorbereiding in Mei in hul agterplaas afsluit.
“Dit was ’n uitdagende maand, fisiek én geestelik, en dis lekker om by die huis te wees – al is dit net vir ’n paar dae.
Ons is baie fikser en meer afgerond as toe ons daar aangekom het en die ouens glo in hulself en in mekaar,” het Tshabalala gesê.
Dié 25-jarige Kaizer Chiefs-speler was, met vyf doele in sewe wedstryde, die grootste uitblinker op ’n toer van gemengde welslae.
Die Suid-Afrikaners het Donderdag vir ’n opskudding in die kleine gesorg deur ’n gelykop-uitslag teen die hoogaangeskrewe Paraguay af te dwing, danksy ’n Tshabalala-poging van sowat 30 meter buite die Suid-Amerikaners se doelhok.
Paraguay beklee ’n yslike 79 plekke bó Bafana op Fifa se wêreldranglys, maar die besoekers het skaars twee dae later teen die klubspan Santos bloedneus gekry.
“Die doel teen Paraguay was sonder twyfel die hoogtepunt van my toer, veral nadat ek in ons laaste wedstryd teen hulle ook my naam op die telbord kon kry.”
Tshabalala, Surprise Moriri en Benni McCarthy het aan Suid-Afrika ’n sege van 3-0 besorg, toe dié spanne sowat twee jaar gelede in Pretoria slaags was.
En hy steur hom nie veel aan die legio doemprofete nie – veral nie dié wat meen dat Bafana Wêreldbeker-kanonvoer sal wees sonder ’n byna bomenslike vertoning deur sy Europese ster Steven Pienaar nie.
Pienaar, Tshabalala en Teko Modise, die Bafana-kaptein, is in ’n fel stryd gewikkel om die middelveld in Carlos Alberto Parreira (afrigter) se beginspan vir WB 2010 te beman.
“Steven is baie belangrik vir ons kanse in die Wêreldbeker. Hy is ’n ware wedstrydwenner en speel uitstekend vir Everton, maar een speler maak nie die span nie,” het Tshabalala gesê.
“Ek verkies boonop dat die meeste van die aandag op hóm is. Hopelik verlig dit die druk op my en kan ek speel met die soort vryheid wat ek die afgelope maand gehad het.”
- Beeld