Rooney weer held ná sy skitterdoel
2011-02-14 08:52
Londen. – Wayne Rooney, omstrede doelskieter van Manchester United, het sy skouspelagtige wendoel in Saterdag se Manchester-derby aan dié sokkerklub se ondersteuners opgedra.
Rooney se verhouding met ondersteuners het versuur sedert hy vroeër dié seisoen gevra het om United te verlaat, maar tog aangebly het ná uitgerekte onderhandelings en ’n aansienlike salarisverhoging.
Hy het tot dusver vanjaar ook nog nie juis beïndruk nie – iets wat sy aansien verder laat daal het.
Maar alles behoort ná Saterdag vergewe te wees. Die 25-jarige Rooney het die perfekte manier gekry om weer diep in United-ondersteuners se harte te kruip toe hy hul span se tweede doel in die sege van 2-1 oor Manchester City met ’n agteroorskop (overhead kick) aangeteken het.
Volgens Alex Ferguson, United se breier, is dit die beste doel wat hy tot nog toe op Old Trafford gesien het – selfs beter as enigiets waarmee Cristiano Ronaldo, David Beckham, Eric Cantona en George Best vorendag kon kom.
“Manchester United se ondersteuners verdien só iets van my,” het Rooney gesê. “Ek beleef nie die beste van seisoene nie en ek weet hoe groot sokker in Manchester is. Ek hoop hulle het dit geniet.”
Rooney se doel het ook so te sê ’n einde gemaak aan City se aspirasies om die Premierliga te wen.
City het nou agt punte minder as United en het boonop een wedstryd meer as sy aartsvyande gespeel.
Arsenal het net vier punte minder as United ná sy sege van 2-1 Saterdag oor Wolverhampton Wanderers.
Tottenham Hotspur het verby Chelsea tot in die vierde plek op die puntelys geskuif nadat hy Sunderland in ’n wegwedstryd met 2-1 geklop het.
Chelsea kan egter weer gelyk met Spurs trek as hy Fulham vanaand (Maandagaand) klop.
Liverpool se oplewing onder hul ikoniese breier, Kenny Dalglish, het Saterdag ’n tydelike terugslag beleef toe die Reds tuis met 1-1 teen Wigan Athletic gelykop gespeel het.
Bly op hoogte van al die jongste sportnuus deur Nuus24Sport op Twitter te volg.
- Sport24
- Sapa - AFP