Rooney in spervuur ná voorval op veld
2011-02-28 08:25
Wigan. – Verskeie oudspelers het Sondag kaalvuis onder Wayne Rooney ingeklim.
Dit volg nadat hy ’n Wigan-teenstander glo Saterdag met die elmboog in die sokkerspanne se Engelse Premierliga-wedstryd bygekom het.
Manchester United het met 4-0 gewen en sy posisie bo-aan die puntelys verstewig.
Rooney het ’n geelkaart ontvang nadat hy James McCarthy van Wigan glo in die gesig geslaan het.
Wigan se afrigter, Roberto Martinez, het gesê Rooney moes die trekpas gekry het, maar die skeidsregter, Mark Clattenburg, wat die bal gevolg het, het beslis dat die voorval nie opsetlik was nie.
Twee gewese spelers van Liverpool, Alan Hansen en Mark Lawrenson, het Sondag in ’n televisiedebat met Martinez saamgestem dat Rooney afgestuur moes word.
Hansen het gesê dat Rooney in groot moeilikheid is.
“Jy kan nie met die beeldmateriaal stry nie,” het Hansen gesê.
As Rooney voor stok gekry word, kan hy vir drie Premierliga-wedstryde, teen Chelsea en Liverpool, en een van Arsenal of Leyton Orient in die FA Cup, geskors word.
“Die media sal met ’n veldtog begin omdat dit Wayne Rooney is. Hulle sal wil toesien dat hy teen Dinsdag opgehang of in die elektriese stoel is ... of so iets. Dis ongelooflik en hou maar die pers dop,” het Manchester se afrigter, Alex Ferguson, gebrom.
In nog ’n voorval het Blackpool se DJ Campbell Sondag om verskoning gevra nadat hy Saterdag teen Wolves afgestuur is. Wolves het die wedstryd met 4-0 gewen.
“Jammer oor gister ... ek wens ek kon dit (my optrede) terugtrek,” het Campbell op Twitter gesê.
* In Sondag se Premierligawedstryde is Manchester City se aanspraak op die titel geknou toe hy en Fulham met 1-1 gelykop gespeel het.
Liverpool se goeie peil sedert Kenny Dalglish as afrigter oorgeneem het, is beëindig toe hy met 1-3 deur West Ham, wat derde laaste op die puntelys was, getroef is.
Bly op hoogte van al die jongste sportnuus deur Nuus24Sport op Twitter te volg.
- Reuters