Ronaldo braak nou óók gal oor blasers
2011-05-05 09:05
Barcelona – Cristiano Ronaldo van Real Madrid word oënskynlik nie afgeskrik deur die hangende tugondersoek na sy breier nie en het bewerings herhaal dat skeidsregters Barcelona se sokkerspan bevoordeel.
Jose Mourinho, breier van Real Madrid, moet voor ’n tugkomitee verskyn nadat hy ná die eerste wedstryd in die halfeindronde van die Kampioeneliga tussen dié twee aartsvyande gal gebraak het. Hy het onder meer beweer die Europese Sokkerfederasie bevoordeel Barcelona.
Mourinho het in dié wedstryd, wat Madrid tuis met 0-2 verloor het, ’n rooikaart ná ’n onderonsie met ’n beampte gekry en kon dus nie in Dinsdagaand se tweede wedstryd leiding aan sy span vanaf die kantlyn gee nie.
Dié wedstryd het met 1-1 gelykop geëindig, wat beteken Barcelona dring tot die eindstryd deur met ’n telling van 3-2 ná die twee halfeindstryde.
“Ons het geweet ons kon Barca klop, maar die skeidsregter het ons nie toegelaat nie,” sê Ronaldo. “Die skeidsregter in die eerste wedstryd, Wolfgang Stark, het ons die kans ontneem om in die eindstryd te speel. Enigeen wat iets van sokker af weet, besef Barcelona kry voorkeurbehandeling.”
Real se spelers was woedend nadat ’n doel deur Gonzalo Higuain kort ná rustyd nie deur die skeidsregter, Frank de Bleeckere, toegeken is nie. Die telling was toe met 0-0 gelykop.
De Bleeckere het beslis Ronaldo het Javier Mascherano van Barca omgestamp in die beweging wat tot die doel gelei het, wat toe nie ’n doel was nie.
“Daar was niks fout met dié doel nie. Gerard Pique het my gestamp en ek het op Mascherano geval. Hy het nie so maklik geval toe hy in Engeland gespeel het nie.
“Maar hy het dié swak gewoonte hier aangeleer, waar almal dit doen,” sê Ronaldo.
Hy meen Madrid se sege in die eindstryd van die Copa del Rey bewys dat hy sy aartsvyand kan klop as beamptes neutraal is.
“Barcelona het baie mag van die veld af.”
Volgens Ronaldo was Barcelona in die afgelope vier wedstryde binne 18 dae nie beter as Madrid nie.
“Barca het net baie hulp van die skeidsregters gehad.”
Vir die jongste sportnuus volg Nuus24Sport op Twitter.
- Sport24
- Reuters