Ronaldo: Ek sal nooit skuif
2009-10-21 02:02
Sao Paulo - Die sokkerster en doelskopper Ronaldo wil sy loopbaan by sy huidige klub sien uitspeel.
Ronaldo het Dinsdag tydens ‘n onderhoud met die sportkoerant, Globoesporte, gesê hy beplan om tot die einde van sy loopbaan by Corinthians te bly.
"Daar is geen manier om die geskiedenis te verander nie. Ek sal vir ewig by Corinthians bly,” het hy gesê.
Ronaldo (33) het meeste van sy loopbaan in Europa gespeel. Hy was by PSV Eindhoven, Barcelona, Inter Milan, Real Madrid en AC Milan. In 2008 het hy teruggekeer Brasilië toe en het 10 maande gelede by Corinthians aangesluit.
"Aanhangers het my met ope arms ontvang en ek het gereageer deur doele te skop,” het hy gesê.
Daar was sprake dat Ronaldo na sy gunsteling klub tydens sy kinderjare, Flamengo, sal skuif maar hy sê dit is nie meer ‘n opsie nie.
“Om vir Flamengo te speel was ‘n droom wat ek gehad het, maar dit is nou verby,” het hy gesê.
- Sapa