Prins van Jordanië nou tweede in bevel by Fifa
2011-01-07 17:15
Doha - Jordanië se Prins Ali bin Al Hussein het die invloedryke Chung Mong-Joon van Suid-Korea Donderdag in 'n verrassende verkiesing uit die kussings gelig as Fifa se adjunk-president.
Chung, die beherende aandeelhouer in die nywerheidsreus Hyundai Heavy Industries, 'n groot Fifa-borg, dien al sedert 1994 as vise-president en sou na verwagting weer in die rol verkies word.
Maar die prins is tot die posisie verkies by 'n kongres van 45 lede van die Asiatiese Sokkerfederasie in Doha. Hy het die posisie gewen met 25 stemme teenoor 20.
Gerugte doen die ronde dat Chung, 59, later in die jaar 'n veldtog van stapel wou stuur om Sepp Blatter as Fifa-president te onttroon. Chung en Blatter het al voorheen vasgesit.
Chung het 10 jaar gelede 'n onsuksesvolle poging ondersteun om Blatter uit sy posisie te stem, en het enkele maande gelede gesê verandering in wêreldsokker se topstrukture kan net goed wees vir die sport.
- Volg Nuus24 op Twitter