Pitso nog nie die Mani vir Bafana
2010-07-02 10:00
Sport24
Johannesburg - Bafana Bafana is gerat om hul aanslag op Afrika se sokkerkroon oor net langer as ’n maand te begin – ondanks die feit dat die span steeds nie ’n afrigter, ’n bloudruk vir die toekoms óf ’n volgende teenstander het nie.
Die Suid-Afrikaanse Sokkervereniging (Safa) het Donderdag ’n “dringende mediakonferensie” byeengeroep, maar sloer steeds met die aanwysing van Carlos Alberto Parreira se opvolger, al vind die eerste oefenwedstryd voor die Afrikabeker-toernooi reeds op 11 Augustus plaas.
Bafana weet boonop steeds nie teen wie of waar dié wedstryd gespeel sal word nie en wag ook nog op ’n “lykskouing” van dié span se mislukte Wêreldbeker-veldtog.
Bafana is voorverlede week uit dié toernooi geboender, ondanks hul spogsege van 2-1 oor Frankryk in Bloemfontein.
Kirsten Nematandani, die Safa-president, het bevestig dat Pitso Mosimane, die Bafana-hulpafrigter, die enigste kandidaat is om by Parreira oor te neem wanneer dié Brasiliaan se kontrak middel aanstaande maand verstryk.
Mosimane, wat die afgelope vier jaar reeds by die nasionale span betrokke is, sal egter eers ’n voorlegging aan Safa se tegniese komitee moet maak.
“As ek my sin kon kry, sou hy Vrydag reeds aangestel word, maar daar is ’n proses wat eers afgehandel moet word,” het Nematandani gesê.
“Carlos het reeds sy vlug terug na Brasilië bespreek en ons het nie eens probeer om hom te oortuig om aan te bly nie, want ons het belowe dat die volgende afrigter ’n Suid-Afrikaner sal wees.”
Volgens hom moet die komitee, wat die oud-Bafana-breier Jomo Sono insluit, binne die volgende twee weke ’n aanbeveling aan die land se sokkerbase maak voordat met Mosimane onderhandel kan word oor sy kontrak.
Mosimane sal glo sowat R400 000 per maand verdien – heelwat minder as Parreira se salaris van sowat R1,8 miljoen.
“Safa se verwagtinge is duidelik: die span moet hom laat geld in die Afrikabeker-toernooi en kwalifiseer vir 2014 se Wêreldbeker-toernooi in Brasilië,” het Nematandani gesê.
Die kwalifiserende wedstryde vir Afrika se spogtoernooi begin in September wanneer Bafana teen Niger te staan kom.
“Ons sal later in meer detail met Pitso praat oor hoe ons dít gaan regkry, sodra ons Carlos se verslag oor ons Wêreldbeker-vertoning gekry het.
Die tegniese komitee moet nou vasstel of Pitso oor die nodige tegniese vaardighede beskik, maar ons het volle vertroue in hom en sy voortgesette toewyding tot die nasionale span.”
Nematandani het onthul dat geen ander kandidate reeds vir die Bafana-pos oorweeg is nie – dus ook nie Gavin Hunt nie, wie se SuperSport United pas ’n rekord opgestel het deur die Premiersokkerliga-titel ’n derde keer agtereenvolgens te wen.
Bly op hoogte van al die jongste sportnuus deur Nuus24Sport op Twitter te volg.