Pitso gaan nie wakker lê oor slae teen Zim
2011-11-17 07:02
Bloemfontein – Met dié saamgeflanste sokkerspan kan Bafana Bafana tot ’n mate verskoon word vir sy “skande” noord van die Limpopo.
Suid-Afrika het Dinsdag in Harare, in die afwesigheid van verskeie gereelde spelers, met 1-2 teen Zimbabwe vasgeval. Dit was sy eerste nederlaag in agt jaar teen sy buurman.
Bafana het die voortou geneem toe een van sy twee nuwelinge, Bradley Grobler, ’n blaps deur ’n verdediger uitgebuit het.
Knowledge Musona, ’n voormalige doelskieter van Kaizer Chiefs, was egter twee keer in die kol om die klompie onervare spelers se buurlandse uitstappie te bederf.
Die Rufaro-stadion was ’n goeie voorsmaak van wat om in die kwalifiserende wedstryd aanstaande jaar teen Botswana vir die Wêreldbeker-toernooi te verwag. Dié wedstryd word ook op ’n astro-sokkerveld beslis.
“Ek is teleurgesteld oor die uitslag, maar die ouens het in omstandighede goeie rekenskap van hulself gegee, sê die breier, Pitso Mosimane. “Die meeste van hulle het nog nooit in die nasionale span saamgespeel nie.”
Mosimane sê dit was ’n goeie oefening om die spelers te beproef. Hulle weet nou wat van hulle verwag word as spelers soos Steven Pienaar, Siphiwe Tshabalala, Katlego Mphela en andere nie beskikbaar is nie. Hy meen hulle sal baat vind by die internasionale blootstelling.
Grobler het Woensdag met die span se aankoms gesê dit was ’n droom wat bewaarheid is toe hy met sy land se kleure op die veld gestap het. Sy doel het die kroon gespan en hy sal dit nog lank onthou.
– Bafana sal Ethiopië op 2 of 3 Junie in sy eerste kwalifiserende wedstryd vir 2014 se Wêreldbekertoernooi pak. Ethiopië het Woensdag in Addis Ababa met ’n sege van 5-0 oor Somalië tot die groep deurgedring waarin Suid-Afrika, Botswana en Sentraal-Afrika is.
Vir die jongste sportnuus volg Nuus24Sport op Twitter