Pienaar: Togo-aanval nie impak op WB
2010-01-11 12:36
Johannesburg – Steven Pienaar het gepoog om vrese oor die Wêreldbeker-sokkertoernooi se finaal uit die weg te ruim na die aanval op die Togo-span.
Die Sparrow Hawks het uit die Afrikabeker-toernooi in Angola onttrek na Vrydag se aanval op die span se bus waarin twee mense dood is. Die span mag moontlik op ‘n latere datum terugkeer na die toernooi.
Die Suid-Afrikaans gebore Pienaar, wat vir Everton in Engeland speel, het gesê dat die aanval nie ‘n impak sal hê op die Wêreldbeker-sokkertoernooi wat later die jaar plaasvind nie.
“Dit sal definitief nie ‘n impak op die Wêreldbeker-sokkertoernooi hê nie,” het die 27-jarige gesê.
“Dit is iets wat gebeur het, maar Suid-Afrika en Angola is twee verskillende wêrelde.”
“Ek kan verstaan dat mense bekommerd kan wees. Hulle het gesien wat gebeur het en mag dalk dink dat dit in Suid-Afrika kan gebeur.”
Pienaar stem saam met Arsene Wenger, Arsenal se bestuurder, dat indien die Afrikabeker-toernooi gekanselleer word, dit as ‘n oorwinning vir terroriste gesien kan word.
“Dit is ‘n skande vir die kontinent en vir die mense wat betrokke is. ‘n Mens kan dit nie doen nie. Sokker is veronderstel om die kontinent bymekaar te bring,” het hy gesê.
"Mense in Afrika is gaande oor die spel, hulle lewe vir sokker. ‘n Voorval soos hierdie is teleurstellend, maar ek dink die toernooi moet voortduur.
“Ek dink nie enigiemand was verras toe hulle gehoor het dat die Afrikabeker-toernooi in Cabinda gehou word nie. As ‘n land gekies word om die Afrikabeker-toernooi aan te bied is dit ‘n eer en almal sien uit daarna,” aldus Pienaar.
- Football365.co.za