PSL-wedstryd af ná traangas-voorval

2012-02-25 20:42

Durban – Die Premiersokkerliga-wedstryd tussen Golden Arrows en Black Leopards in Umlazi, buite Durban, is Saterdag afgestel ná traangas by die King Zwelithini-stadion dit vir spelers onmoontlik gemaak het om aan te speel.

Die wedstryd was sowat 10 minute aan die gang toe die rook deur die stadion begin trek het.

Dit is eers aan die suidelike kant van die stadion opgemerk, waarna dit na die hoofpawiljoen en presidensiële gebied versprei het.

Spelers van albei spanne het van die veld af gehardloop met hulle sokkertruie oor hul monde.

Die traangas was afkomstig van 'n politieke byeenkoms sowat 200 m van die stadion, waar sake glo handuit geruk het en die polisie ingetree het.

Die traangas het na 'n ruk verdwyn, maar die Leopards se bestuur het aangevoer dat van dié span se spelers siek was as gevolg van die rook.

Die Ugandese doelwagter Posnett Omony en twee ander spelers moes na 'n hospitaal geneem word vir behandeling.

– Vir die jongste sportnuus volg Nuus24Sport op Twitter.

- SAPA