‘Onnosel’ Safa moet appèl laat vaar
2011-10-11 12:03
Johannesburg – Bafana Bafana is beroof van ’n plek in die Afrikabeker-toernooi – en dié sokkerspan het steeds nie herstel van die vernedering van sy chaotiese Afrikabeker-“uittog” nie.
Siphiwe Tshabalala en Itumeleng Khune het Maandag erken hulle was “glad nie bewus nie” van die omstrede reël wat veroorsaak het dat Niger voor Suid-Afrika deurgedring het tot aanstaande jaar se skouspel in Gaboen en Ekwatoriaal-Guinee – én wat die Suid-Afrikaanse Sokkervereniging (Safa) nou in die hof wil betwis.
Die Suid-Afrikaners het Saterdagaand in die Mbombela-stadion in Nelspruit geglo hulle het “deurgedring” danksy ’n gelykop-uitslag van 0-0 in hul laaste kwalifiserende wedstryd in Groep G, teen Sierra Leone, maar is oomblikke later meegedeel dat dit nie die geval was nie.
Die tuisspan het bo-aan dié groep geëindig met ’n beter doeleverskil, danksy Egipte se verrassende sege van 3-0 oor Niger in Kaïro. Tog het die Konfederasie van Afrika-sokker (CAF) beslis dat Niger in sy eerste Afrikabeker sal speel, aangesien hy die beste gevaar het in kragmetings tussen dié drie lande.
“Ons is verpletter en dis kommerwekkend dat ons eers ná die wedstryd van die betrokke reël gehoor het,” het Tshabalala, Bafana se waarnemende kaptein, gister gesê. “Dis die eerste keer dat ek van dié reël hoor, want ons was nog altyd onder die indruk dat doeleverskil in só ’n geval bepalend is.”
Volgens Khune, die Bafana-doelwagter, het die span “net mooi niks geweet” van CAF se reël nie.
“Hoe kan CAF die reëls ná die wedstryd gaan verander? As ons voor die wedstryd geweet het daarvan, sou ons beslis ’n ander benadering gehad het.”
Khune was gister die teiken van emmersvol kritiek op sosiale netwerke weens sy tydmors-taktiek in die doodsnikke van dié kragmeting.
“Jy behoort verskoning te vra vir jou aaklige gedrag,” het een gebruiker op Facebook geskryf. “Dié truuk van jou het ons ’n plek in die Afrikabeker gekos, jou idioot.”
Aanhangers was ook nie ten gunste nie van Safa se besluit om teen dié uitslag te appelleer.
– Vir die jongste sportnuus volg Nuus24Sport op Twitter.
- Die Burger