Mosimane lig sluier oor Operasie 2014
2010-07-23 07:28
Johannesburg - Suid-Afrikaanse sokker se Operasie 2014 het Donderdag in alle erns begin.
En te oordeel na die Bafana Bafana-bloudruk van hul afrigter, Pitso Mosimane, is heelparty hardebaarde se dae in die Groen-en-Goud getel.
Mosimane, wat verlede week as Carlos Alberto Parreira se opvolger aangewys is, het dit Donderdag duidelik gemaak dat “nuwe generasie”-spelers ingespan sal word om Suid-Afrika in die Afrikabeker-toernooi in 2012 in Gaboen en Ekwatoriaal-Guinee en 2014 se Wêreldbeker-toernooi in Brasilië te verteenwoordig.
Hoewel dié 45-jarige breier vroeër ontken het dat hy van die 30-jarige Aaron Mokoena as nasionale kaptein ontslae wil raak, het hy bevestig dat die klem voortaan op die ontwikkeling van jong talent sal wees.
“Siphiwe Tshabalala is vir Suid-Afrika gekies terwyl hy nog maar in die laer ligas gespeel het en dit is belangrik dat ons ander belowende spelers op soortgelyke wyse identifiseer,” het Mosimane gesê.
Tshabalala was een van Bafana se groot Wêreldbeker-helde en is hoog op die inkopielys van ’n handvol Engelse spogklubs.
Volgens Mosimane sal plaaslike én oorsese spelers deurlopend geëvalueer word en sal nou saamgewerk word met afrigters van spanne in die Premiersokkerliga (PSL) om dié spelers te eien en vir hoër louere te slyp.
“My voorstel aan dié afrigters sal wees om hoogstens drie oorsese spelers en minstens twee plaaslike o.23-spelers in hul beginspanne te kies.
“Ek wil ook verseker dat dié ouens nou reeds internasionale ervaring opdoen deur in wedstryde teen ons buurlande te speel en na die Afrikabeker-toernooi te gaan.
“Net soos dit in Afrika die gebruik is dat ’n hele gemeenskap saam ’n kind grootmaak, gaan ek die ondersteuning van die hele Suid-Afrika benodig om Operasie 2014 te laat slaag.”
Volgens Leslie Sedibe, Safa se uitvoerende hoof, sal ondersteuners reeds op 11 Augustus ’n voorsmaak kry van Mosimane se “meesterplan”, wanneer Bafana op Soccer City teen Ghana te staan kom.
“Die pad na 2014 gaan steil wees, maar Pitso het ons volle ondersteuning.”
Bly op hoogte van al die jongste sportnuus deur Nuus24Sport op Twitter te volg.
- Sport24