Man United weer eerste; Rooney steeds doelloos
2010-12-15 00:15
Pieter-Louis Myburgh en SAPA
Johannesburg - Alex Ferguson se Red Devils is weliswaar weer bo-aan die puntelys van die Engelse Premierliga nadat hulle Arsenal Maandag met 1-0 op Old Trafford geklop het, maar dié breier het bra min lof vir sy ster-doelskieter gehad.
Wayne Rooney, wat benewens strafdoele in Maart laas die bal in die doelhok gekry het, se gesig was eergisteraand rooier as sy trui nadat hy ’n strafdoelpoging lelik verbrou het.
Rooney het diep in die tweede helfte ’n kans gekry om Manchester United se voorsprong te rek nadat die bal die hand van Arsenal se Gael Clinchy in die doelgebied getref het.
“Dit was ’n eienaardige doelskop,” het Ferguson oor Rooney se mislukte poging om Arsenal se doelwagter te flous, gesê.
“Wayne hou normaalweg die bal laag.
Ek het nog nooit gesien hoe hy die bal bo-oor die doelhok skop nie.”
Ferguson het egter vleiende woorde vir die Suid-Koreaanse middelveldspeler Park Ji-Sung gehad.
Hy het kort voor rustyd die wedstryd se enigste doel aangeteken en só drie broodnodige ligapunte vir Manchester United verdien.
“Sy vertoningslys teen Arsenal is baie goed en hy is deesdae fantasties op dreef,” het hy gesê.
Ferguson was ook tevrede met sy verdedigers.
Rio Ferdinand-hulle het Arsenal se doelskieters weinig kans gegee om die bal naby die tuisspan se doelhok te kry.
“Ek het gedink ons agterste vier was fantasties.
As my verdedigers daardie grondslag lê en aanhou doele keer, het ons ’n baie goeie kans (om die liga te wen),” het Ferguson gister aan The Telegraph gesê.
Arsenal, wat nou die tweede plek op die puntelys beklee, is inderdaad min beweegruimte deur United se verdedigers gegun en het net een noemenswaardige kans gehad om ook ’n doel aan te teken.
Die Gunners se afrigter, Arsene Wenger, het laat in die tweede helfte besef sy begin-elftal kom nie die mas teen United se gesoute verdedigers op nie.
Hy het toe vir Cesc Fabregas en Robin van Persie opgestuur om doele vir die besoekers te help skep.
Dié twee sterspelers is egter juis uit die beginspan gelaat omdat albei nog van beserings herstel en kon nie veel van ’n impak maak nie.
Wenger, wat teen dié tyd goed besef hoe moeilik dit is om Manchester United op sy tuisveld te pak, was optimisties ondanks sy span se nederlaag.
“Ek dink nie ons het swak gespeel nie.
“Ons het wel verloor, maar dit kan maklik hier (op Old Trafford) gebeur.”
Manchester United het dié seisoen nog nie een wedstryd in die Premierliga verloor nie en speel Sondag in ’n wegwedstryd teen Chelsea.
Bly op hoogte van al die jongste sportnuus deur Nuus24Sport op Twitter te volg