Man United neem wraak
2012-01-09 08:29
Manchester – Manchester City se FA Cup- drome lê aan skerwe, nadat sy aartsvyand, Manchester United, hom gister in die derde ronde van dié reeks op dramatiese wyse uitgeskakel het.
United het die wedstryd met 3-2 beklink en daarmee saam sy wendroogte gebreek.
Sir Alex Ferguson se Red Devils het hulle in twee agtereenvolgende kragmetings teen Blackburn Rovers en Newcastle vasgeloop, maar het gister gewys hoekom hulle meer as ’n dekade laas drie wedstryde in ’n ry verloor het.
United het die eerste helfte oorheers en reeds teen rustyd met 3-0 voorgeloop. Die doelskieter Wayne Rooney het uitgeblink en twee van dié doele aangeteken.
City moes die grootste deel van dié wedstryd met net 10 spelers klaarkom, nadat sy kaptein, Vincent Kompany, ná net 12 minute vir gevaarlike spel van die veld gestuur is.
Tog het hulle verbete teruggeveg en Aleksandar Kolarov en Sergio Aguero het albei in die tweede helfte ’n doel vir City aangeteken.
Dié twee spanne het in Oktober laas koppe gestamp toe City Manchester in ’n Premierligawedstryd met 6-1 op Old Trafford vermorsel het. Gister het United laaste gelag
Die 37-jarige Paul Scholes, wat in Mei verlede jaar uitgetree het, het gister weer sý “buiging” vir United gemaak.
In die naweek se ander wedstryde het Tottenham Hotspur ’n oorwinning van 3-0 oor Cheltenham behaal. Tottenham se aanvallende trio, Jermain Defoe, Roman Pavlyuchenko en Giovani dos Santos, het doele aangeteken.
Wigan Athletic en Blackburn Rovers, wat die onderste twee plekke op die Premierliga-puntelys beklee, kon nie hul mistroostige peil dié seisoen afskud nie.
Swindon het Wigan met 2-1 geklop, terwyl Newcastle daarin geslaag het om Blackburn met 2-1 uit te skakel.
Die Amerikaanse middelveldspeler, Clint Dempsey, het ’n driekuns in Fulham se tuisoorwinning van 4-0 oor Charlton behaal.
Die Ierse doelskieter Simon Cox het dieselfde in West Brom wich Albion se sege van 4-2 oor Cardiff City vermag, terwyl Aston Villa, Stoke, Norwich, Blackpool en Liverpool almal oortuigende seges behaal het.
– Vir die jongste sportnuus volg Nuus24Sport op Twitter.
– Spa-AP; AFP
- Sapa - AP