Liverpool-ondersteuners met knuppels aangeval

2010-10-21 13:35

Napels, Italië - Twee Liverpool-ondersteuners is in die hospitaal opgeneem nadat hulle deur 'n groep jeugdiges met knuppels en ten minste een mes in Napels aangeval is, het die media in Italië berig.

Die aanval het vroeg Donderdagoggend plaasgevind. Liverpool speel vanaand (Donderdagaand) in 'n ligawedstryd om die Europa-beker teen Napoli by die San Paolo-stadion.

Lee Friar (44) het kopbeserings opgedoen en is reeds uit die hospitaal ontslaan terwyl die 53-jarige Alexander Phillips nog vir 'n meswond in sy been behandel word, het die La Gazzetta dello Sport berig.

In 'n aparte voorval in Napels, is 'n 28-jarige Italianer beseer toe hy twee Liverpool-ondersteuners in sy kroeg teen aanvallers wou beskerm.

Niemand is nog in verband met die aanvalle in hegtenis geneem nie.

Sowat 60 000 ondersteuners word by vanaand se kragmeting tussen Napoli en Liverpool verwag.

Bly op hoogte van al die jongste sportnuus deur Nuus24Sport op Twitter te volg.

- Sport24