Laaste sokkerspeler van eerste WB sterf
2010-08-31 16:25
Buenos Aires - Die laaste oorblywende sokkerspeler, wat aan die heel eerste Wêreldbeker in 1930 deelgeneem het, het op 100-jarige ouderdom gesterf.
Francisco 'Pancho' Varallo van Argentinië het Maandag weens natuurlike oorsake gesterf, het sy familie bevestig.
Varallo, wat 'Canoncito' (die klein kanon) genoem is, was deel van Argentinië se span wat met 4-2 teen Uruguay in die Wêreldbeker-eindstryd op 30 Julie 1930 verloor het.
Hy het jare lank die rekord gehou as Boca Juniors se voorste doelskieter met 194 doele in 222 professionele wedstryde. Die rekord is eers in 2008 deur Martin Palermo verbeter.
Varallo het sy sokkerloopbaan in 1928 in sy tuisdorp by Gimnasie y Esgrim La Plata begin, waar hy op 5 Februarie 1910 gebore is en ook gesterf het.
Hy het in 1994 'n meriete-toekenning van Fifa ontvang vir die bydrae wat hy tot sokker gelewer het.
Bly op hoogte van al die jongste sportnuus deur Nuus24Sport op Twitter te volg.
- Sport24