Koeëlvaste baadjies vir 2010?
2009-10-21 17:01
Leverkusen, Duitsland – Sokkerspelers hier is Woensdag gewaarsku dat hulle tydens volgende jaar se toernooi koeëlvaste baadjies in Suid-Afrika sal moet dra wanneer hulle van die hotel wegbeweeg.
Die hoof van die sekuriteitsfirma BaySecur, wat na die Duitse Sokkerfederasie (DFB) en hul gaste omsien wanneer die nasionale span in die buiteland speel, het gesê sterre soos Michael Ballack sal ekstra versigtig in Suid-Afrika moet wees.
BaySecur is een van die firmas wat na verwagting deur die sokkerfederasie ontplooi gaan word, terwyl die span aan die toernooi vanaf 11 Junie tot 11 Julie gaan deelneem.
“Die moontlikheid vir die spelers om buite die hotel se grense te beweeg, sal tot 'n minimum gehou word,” het Guenter Schnelle van BaySecur aan die Duitse tydskrif Sport-Bild gesê.
“Só nie, moet die span ten volle vergesel word deur sekuriteitsbeamptes, en daar moet ook koeëlvaste baadjies vir die spelers wees.”
Die DFB kyk reeds na moontlikhede om die veiligheid by die span se hotel in Pretoria te verskerp.
Volgens Helmut Spahn, sekuriteitsbaas by BaySecur, gaan hulle 20 ekstra sekuriteitswagte aanstel vir die span se verblyf by hul hotel.
“As gevolg van die hoë misdaadsyfer in [Suid-Afrika] wil ons geen kanse vat met sekuriteit of veiligheid nie.”
“Ons sal seker meer personeel as gewoonlik gebruik,” het Spahn gesê. Hy gaan reeds volgende week vier dae in Suid-Afrika deurbring om veiligheidsmaatreëls te bekyk.
Volgens Spahn is die kanse klein dat die DFB tydens die toernooi slegs op Suid-Afrikaanse sekuriteitswagte sal staatmaak. Hy sê Duitsland se polisie is reeds in gesprek met hul sokkervereniging oor dié kwessie.
- AFP