Kaapstad-stadion hou makietie
2010-07-21 16:00
Kaapstad – Daar gaan groot makietie gehou word by die Kaapstad-stadion in Groenpunt, het die stadion-operateur se voorsitter, Morné du Plessis, aangekondig.
Du Plessis het gesê die 'partytjie', wat vir 27 Augustus beplan word, sal deels die afskop van die plaaslike sokkerliga (PSL)-seisoen vier.
Nog wedstryde in die pyplyn sluit ‘n Bafana Bafana-kragmeting, ‘n sokkerwedstryd vir liefdadigheid en ‘n vriendskaplike wedstryd tussen die Engelse rugbyklub Saracens en die span van die Stormers in.
Daar word ook beplan om ‘n sewesrugby-kragmeting van die Internasionale Rugbyraad (IRR), wat gewoonlik in George gespeel word, by die Kaapstad-stadion aan te bied.
Planne vir volgende jaar sluit ook ‘n Drienasies-wedstryd en 'n paar Varsitybeker-wedstryde in.
Du Plessis het ook die finale bywoningsyfer vir die Kaapstad-stadion tydens die Wêreldbeker-toernooi bevestig. Sowat 507 332 toeskouers het tydens die Wêreldbeker deur die hekke gestap.
By die stadion het toeskouers sowat R13 089 940 op verversings spandeer ('n gemiddeld van R25.79 per persoon).
Bly op hoogte van al die jongste sportnuus deur Nuus24Sport op Twitter te
volg.
- Sport24