John Terry se rassisme-verhoor begin

2012-09-24 13:15

Wembley, Engeland – John Terry se rassisme-verhoor sou na verwagting Maandag begin, 'n dag nadat hy sy uittrede uit internasionale sokker aangekondig het.

Die voormalige Engelse sokkerkaptein word daarvan beskuldig dat hy tydens 'n premierliga-wedstryd in Oktober verlede jaar rassistiese uitlatings teenoor die Queens Park Rangers-sokkerspeler Anton Ferdinand gemaak het.

Hy het dié bewering ontken en is in Julie op 'n kriminele aanklag deur 'n hof in Londen vrygespreek.

Terry het gesê die voetbalvereniging se besluit om voort te gaan met die klagtes teen hom nadat hy deur 'n hof vrygespreek is, het sy posisie in die nasionale span onhoudbaar gemaak.

Terry is toegelaat om steeds sokker te speel hoewel hy sy kapteinskap van Engeland kwyt was.

Alex Horne, die FA se sekretaris-generaal, het gesê hy kan nie sien hoe hulle Terry se posisie onhoudbaar gemaak het nie.

– Volg Nuus24 op Twitter.
 

- Sapa - AP