Hofstryd kan Liverpool se seisoen verongeluk
2010-10-15 08:38
Londen – Asof die Engelse sokkerreus Liverpool nie vanjaar genoeg die wind van voor op die veld kry nie, dreig die voortslepende stryd om eienaarskap van dié klub nou om die Reds se seisoen verder te verongeluk.
’n Hofuitspraak in Texas Woensdag het die klub se raad tydelik verbied om die klub te verkoop en só die stryd om eienaarskap gister nogmaals in die Londense hooggeregshof laat beland.
George Gillet en Tom Hicks, Liverpool se huidige eienaars, was vroeër gekant teen ’n besluit deur die klub se raadslede om ’n aanbod van £300 miljoen van ’n Amerikaanse sportmaatskappy te aanvaar.
Volgens Gillet en Hicks van Amerika is dié aanbod te laag en het hulle dit as ’n “epiese bedrogspul” beskryf.
Regter Christopher Floyd het Woensdagoggend in die hooggeregshof die eienaars se pogings om die transaksie te stuit, van die hand gewys.
Gillet en Hicks het egter kort daarna ’n uitspraak van ’n hof in Texas verkry om die transaksie tydelik op te skort.
Dié regstryd, wat wentel om £285 miljoen se skuld wat teen vandag aan die Royal Bank of Scotland terugbetaal moet word, sou gistermiddag laat weer in die hooggeregshof voortduur.
Indien Liverpool se enorme skuldlas nie voor vandag vereffen is nie, kan die klub onder finansiële administrasie geplaas word en só nege Premierliga-punte verloor.
Intussen het New England Sports Ventures, die maatskappy wat Liverpool aanvanklik sou koop, mededinging gekry.
’n Sakeman van Singapoer, Peter Lim, het Dinsdag ’n aanbod van £320 miljoen gemaak en belowe om nóg £40 miljoen aan nuwe spelers vir die span te bestee as sy aanbod aanvaar word.
Die afrigter van Liverpool, Roy Hodgson, se span is tans 18de (van die 20 spanne) op die Premierliga-puntelys en kon net een van sy sewe wedstryde tot dusver in dié kompetisie wen.
Bly op hoogte van al die jongste sportnuus deur Nuus24Sport op Twitter te volg.
- Sport24