Hoë lof vir Jonny ná hy stewels ophang
2011-12-14 12:30
Londen – Die voormalige Engelse rugbyafrigter Clive Woodward het Jonny Wilkinson as ’n “uitstaande spanspeler” uitgesonder nadat dié losskakel sy uittrede uit toetsrugby aangekondig het.
Woodward was die afrigter wat Wilkinson gekies het om sy buiging vir Engeland in 1998 te maak – die eerste van 91 toetswedstryde wat hy gespeel het.
In 2003 het Woodward as breier toegekyk hoe Wilkinson ’n Wêreldbeker-triomf vir Engeland met ’n skepdoel in bykomende speeltyd in die eindstryd teen Australië in Sydney verseker het.
Die 32-jarige Wilkinson gaan nog voortaan vir sy Franse klubspan, Toulon, speel, maar Woodward onthou ’n speler wat uiters waardevol vir die Engelse nasionale span was.
“Hy het daarna gemik om die nommer 1-speler in die wêreld in sy posisie te word, maar agter die skerms was sy spanetiek fantasties en was hy ’n ware rolmodel.
“Ek het hom altyd bewonder vir hoe hy te werk gegaan het en hoeveel werk hy gedoen het wanneer almal reeds huis toe is,” het Woodward gesê.
“Hy het baie op sy eie gedoen om die spel te bestudeer en te leer. Dit kan ’n les vir enige jongmens wees. Hy het sy spel tot ’n nuwe vlak geneem.”
Wilkinson is Engeland se rekord-puntemaker en tweede op die algehele lys vir puntemakers in toetsrugby – net ná Dan Carter van Nieu-Seeland.
Insluitend die punte wat hy vir die Britse en Ierse Leeus aangeteken het, het Wilkinson 1 246 toetspunte opgestapel. Ná die Wêreldbeker-eindstryd in 2003 het beserings Wilkinson vir byna vier jaar uit toetsrugby gehou voordat hy sy terugkeer gemaak het.
Stuart Lancaster, wat verlede week as Engeland se tussentydse afrigter aangestel is, het intussen laat blyk hy gaan Wilkinson nie sommer net laat verdwyn nie.
“Hy sal steeds groot dinge vir Toulon doen en ek sal hom graag in Frankryk wil gaan sien om van sy groot kennis en ervaring van 13 jaar op die kruin van die internasionale spel te gaan leer.”
– Bly op hoogte van al die jongste sportnuus deur Nuus24Sport op Twitter te volg
- Sapa - AFP