Hitte ’n bondgenoot vir Niger teen SA
2011-09-03 08:18
Bloemfontein – Die Suid-Afrikaanse sokkerspan kan ’n vyandige ontvangs te wagte wees, terwyl die ondraaglike hitte van Niamey ook Saterdag in die spanne se herontmoeting ’n bondgenoot vir Niger kan wees.
Die tuisspan hoop om die bordjies te verhang nadat Bafana Bafana die spanne se eerste kragmeting in die kwalifiserende ronde vir die Afrikabeker-toernooi verlede jaar in Nelspruit met 2-0 gewen het.
Sommige meen al die eksterne faktore, soos die speeltoestande, is een van die redes waarom Niger drie jaar laas ’n tuiswedstryd verloor het.
Suid-Afrika het in Phokeng buite Rustenburg geoefen waar die kwik ’n keer tot 30 grade Celsius geklim het. In Niamey kan dit nóg tien grade Celsius warmer raak, wat deur diegene wat dit nie gewoond is nie, as ’n “bykomende teenstander” beskou word.
Siphiwe Tshabalala, waarnemende Suid-Afrikaanse kaptein, het gister met die span se vertrek aan Sapa gesê hulle het ’n idee wat wag en dat hulle geestelik voorbereid daarop is.
“Ons het ’n paar ervare spelers wat al gewoond daaraan is.”
Die meer as ’n handvol beseerdes wat by die huis moes agterbly, sal stellig ook in Suid-Afrika se agterkop wees.
Die feit dat Katlego Mphela op die vliegtuig was, beteken nie hy gaan speel nie.
Dié skerpskutter het sy knie Woensdag in ’n oefening beseer. Bafana sal hom bitter graag weer in hul geledere wil hê ná sy twee doele in die opwarmwedstryd teen Niger se buurman, Burkina Faso. ’n Besluit oor sy deelname sal eers môre geneem word.
Suid-Afrika kan met ’n oorwinning vir aanstaande jaar se Afrikabeker-toernooi kwalifiseer, wat gesamentlik deur Ekwatoriaal-Guinee en Gaboen aangebied word.
Bafana is onoorwonne ná vier wedstryde en loop voor in hul groep waarin hy met Niger, Sierra Leone en Egipte meeding.
Sy twee wedstryde tot dusver in Freetown en Kaïro het gelykop geëindig en hy sal die naweek, uitgedun of nie, met ’n eerste wegsege wil terugkeer.
– Volg Nuus24Sport op Twitter.