'Handbal Suarez' byt opponent
2010-11-23 08:39
Amsterdam. – Twee internasionale sokkersterre is in die knyp ná beweerde voorvalle van ongeoorloofde spel.
Ajax Amsterdam is onder druk om hul Uruguaanse doelskieter Luis Suarez te skors nadat Saterdag op TV gesien kon word hoe hy ’n speler van PSV Eindhoven, Otman Bakkal, byt.
Die skeidsregter in dié Nederlandse Eersteliga-stryd het nie die voorval gesien nie, maar dié land se sokkerowerhede kan wel tugstappe op grond van die beeldmateriaal doen.
Suarez, wat deur die media as die “Kannibaal van Ajax” gedoop is, het in WB 2010 ook onder hewige kritiek deurgeloop ná hy die bal met die hand hanteer het en sodoende gehelp het dat Ghana uitgeskakel word.
In Italië is die kans goed dat Samuel Eto’o, Inter Milan se Kameroense doelskieter, ook ’n skorsing op die lyf gaan loop.
Italië se sokkerfederasie het gister videomateriaal aangevra nadat op TV gesien kon word hoe Eto’o Chievo se Bostjan Cesar met die kop stamp.
Eto’o sal na verwagting vir minstens twee tot drie weke vir dié onbesonne daad gestraf word.
Bly op hoogte van al die jongste sportnuus deur Nuus24Sport op Twitter te volg.
- Sapa - AFP