Groot slag vir Bafana
2011-09-05 08:04
Niamey (Niger). – Bafana Bafana se veldtog om vir aanstaande jaar se Afrikabeker-toernooi te kwalifiseer, het Sondag hier ’n terugslag beleef met ’n nederlaag teen Niger.
Die tuisspan het met 2-1 gewen.
Dit was nie net die Suid-Afrikaanse sokkerspan se eerste wedstryd in sy kwalifiserende veldtog wat hy verloor het nie, maar ook die eerste waarin hy ’n doel afgestaan het.
Niger het in elke helfte in dié wedstryd in die Generaal Seyni Koutche-stadion ’n doel aangeteken om die sege te verseker, hoewel Andile Jali se doel sowat 20 minute voor die einde die Suid-Afrikaners op ’n gelykop-uitslag laat hoop het.
Maar Niger se verdediging het gehou en die Suid-Afrikaners is terug huis toe sonder ’n punt.
Niger is met dié sege nou in die eerste plek in die kwalifiserende groep met nege punte.
Suid-Afrika en Sierra Leone is in die tweede plek op agt ná vyf wedstryde.
Bafana Bafana sal in die laaste kwalifiserende wedstryd tuis met Sierra Leone kragte meet, terwyl Niger Egipte in ’n wegwedstryd pak.
Sierra Leone het Egipte Saterdag in Freetown met 2-1 geklop en daardeur die druk op Bafana opgelaai om in Niamey te wen.
Suid-Afrika het op die agtervoet begin nadat sy top-doelskieter, Katlego Mphela, nie ’n fiksheidstoets kon slaag nie.
Hy het sy linkerknie verlede week beseer.
Pitso Mosimane, Bafana Bafana se afrigter, het verkies om die wedstryd te begin met Bernard Parker as doelskieter en Thulani Serero as sy adjudant.
Jingles, soos Mosimane bekend is, het sy middelveld met Jali en Thanduyise Khuboni versterk. Die tuisspan het sy eerste doel vroeg in die wedstryd aangeteken.
Dankwa E Kofi het ná ’n hoekskop die bal met sy kop in die Suid-Afrikaners se doelhok gestamp.
Bafana Bafana het weer mooi reggeruk, maar die hitte van 35 grade Celsius het skynbaar sy tol geëis soos die wedstryd gevorder het.
Die besoekers se verdediging het kwesbaar gelyk en dit was duidelik dat die Suid-Afrikaners Mphela gemis het.
Niger het die meeste besit in die eerste helfte gehad en Bafana se doelwagter, Ithumeleng Khune, moes sy span ’n keer of wat red.
Niger het die tweede helfte begin met die spel wat hy in die eerste opgedis het.
Ouwa Moussa Maazou het die tuisspan se telling verdubbel in die eerste minuut van die tweede helfte nadat hy swak verdediging van Bafana uitgebuit het.
Jali kon sy doel eers in die 70ste minuut aanteken ná goeie spel in die middelveld.
Hy is kort daarna met ’n geelkaart gestraf.
Vier minute se beseringstyd het Niger se ondersteuners laat naels kou, maar hulle kon eindelik gelukkig huis toe gaan.
Vir die jongste sportnuus volg Nuus24Sport op Twitter.
– Sport24