Goeie nuus vir Beckham voor 2010
2009-12-29 09:33
Londen - Die voormalige kaptein van Engeland se nasionale sokkerspan, David Beckham, het volgens Fabio Capello, bestuurder van die Engelse nasionale sokkerspan, `n goeie kans om in aanstaande jaar se Wêreldbeker-sokkertoernooi vir die land uit te draf - mits hy fiks is en gereeld speel in die aanloop tot die toernooi.
Die speler van Los Angeles Galaxy kom vandag in Italië om vir AC Milan te speel. Dit sal die tweede keer wees wat hy aan dié span uitgeleen word.
"Ek sal beslis vir Beckham naderroep as hy fiks en gereed is om te speel," het Capello vir die La Gazzeta dello Sport gesê.
"Ek kyk nie na ouderdom nie, ek kyk na kwaliteit en Beckham het baie daarvan. Hy is ernstig, hy is professioneel en die Wêreldbeker-sokkertoernooi is baie belangrik vir hom."
Capello is vol vertroue dat die 34-jarige speler wat voorheen vir Manchester United en Real Madrid gespeel het, die goeie vorm sal herhaal wat hy in sy eerste sarsie spel vir die Serie A-klub vertoon het.
"Hy sal goed doen by AC Milan, ek twyfel glad nie daaraan nie. David is 'n speler wie se kop reg sit op sy skouers."
Capello sê hy was baie tevrede met die aankoms van sy vriend Roberto Mancini by Manchester City. Mancini is die nuutste in `n reeks Italiaanse afrigters wat in topposisies aangestel word.
"Dit is `n rede om trots te wees op ons sokker," sê Capello. "Italianers word gekies omdat ons idees en 'n behoefte aan nuwe ervarings na die tafel toe bring."
Tog sê die voormalige afrigter van Milan, Juventus en Real Madric dat Italianers ten spyte van hierdie sukses steeds baie by die Engelse spel kan leer.
"Die Premierliga is die interessantste, mooiste kampioenskap in die wêreld. Daar is vol stadions, veiligheid, skoonheid en 'n gebrek aan onnoselheid by betrokke."
"Vat maar Newcastle United. Hulle is gerelegeer en steeds toegejuig. Nou speel hulle op die tweede vlak en 50 000 gaan kyk vir hulle. Die atmosfeer in Italië is baie anders – aggresief, mislik."
"Ons maak dieselfde foute met die bestuur van stadions en geweldadige aanhangers. Ons verbeter nie, ons beweeg nie vorentoe nie, ons los nie probleme op nie. Dit ontstel my," sê Capello.
- www.supersport.com