Geld kan nie alles koop vir Portsmouth
2010-03-08 12:06
Londen. – Portsmouth mag dalk bankrot wees, maar dié beleërde Britse sokkerklub is op pad Wembley toe.
Portsmouth, wat onlangs onder geregtelike bestuur geplaas is en heel onder op die Premierliga se puntelys is, het die halfeindronde van die reeks om die FA Cup gehaal deur Birmingham City met 2-0 te klop.
Frederic Piquionne, wat by die Franse klub Lyon geleen word en dikwels nie betaal is nie vanweë Portsmouth se geldprobleme, het albei doele aangeteken.
“Daar is geen ander span wat dit meer verdien om Wembley toe te gaan nie,” het Avram Grant, Pompey se afrigter, aan Radio 5 Live gesê.
“Ek is so trots. Mense het geen idee hoe moeilik dit is om dag ná dag te werk terwyl daar sulke probleme is nie.”
Birmingham het nie veel bygedra om van die wedstryd ’n skouspel te maak nie, maar sal briesend wees omdat ’n doel van Liam Ridgewell nie toegeken is nie hoewel die bal duidelik oor die lyn in die doelhok was.
Dié omstrede beslissing is gevel minute nadat sokker se reëlmakers aangekondig het dat hulle nie televisie-tegnologie in sulke gevalle sal inspan nie.
“Ek is ten gunste daarvan (tegnologie) en is gefrustreerd deur Fifa se besluit. En dit is nie net oor wat vandag (Saterdag) gebeur het nie,” het Alex McLeish, Birmingham se afrigter, gesê.
“Dit word in ander sportsoorte gebruik.
“Ek kan nie sien waarom ons dit nie ook kan doen nie, veral op top-vlak.”
Fulham en Tottenham Hotspur het in die ander kwarteindstryd weer gelykop gespeel (0-0) en sal mekaar nou ’n derde keer die stryd aansê om te bepaal wie speel in die halfeindronde.
Aston Villa het sy plek in die halfeind verseker deur drie doele in tien minute aan te teken om ’n agterstand van 0-2 teen Reading uit te wis.
John Carew, wat twee van dié doele aangeteken het, het sy driekuns in die 90ste minuut met ’n strafdoel voltooi.
Chelsea het Stoke in gistermiddag se laaste kwarteindstryd met 2-0 geklop.
In die Premierliga het Manchester United weer die eerste plek op die puntelys ingeneem met ’n sege van 1-0 oor Wolverhampton.
Arsenal is derde ná sy sege van 3-1 oor Burnley.
- Die Burger