‘Fifa wou nooit WB skuif nie’

2010-05-09 09:23

Antoinette Slabbert

Durban - Hy het twee jaar laas gehuil en wou nooit die Wêreldbeker-sokkertoernooi weens veiligheidsvrese uit Suid-Afrika verskuif nie.

Met dié woorde het Jérôme Valcke, sekretaris-generaal van die sokkerbeheerliggaam Fifa, Suid-Afrika se polisiehoof, genl. Bheki Cele, voor joernaliste vanoor die hele wêreld tot leuenaar gemaak.

Valcke het saam met Danny Jordaan, hoof van Fifa se plaaslike reëlingskomitee, vrae beantwoord van sowat 80 plaaslike en interna­sionale joernaliste oor WB 2010 by die jaarlikse toerisme-indaba in Durban. Hy het gesê hy reageer op Cele se stellings Vrydag voor die parlementêre portefeuljekomitee oor polisie.

Volgens Sapa het Cele gesê ná die aanval op die sokkerspan van Togo tydens die Afrika­nasiesbeker­toernooi in Angola het polisieverteenwoordigers op 27 Januarie op die O.R. Tambo-lughawe met Fifa vergader.

“Ons het op 27 Januarie ’n SOS van Fifa gekry,” het Cele gesê. “Ons was ’n bietjie vererg omdat hulle ons ontbied het soos skoolseuns wat na die hoof se kantoor moet gaan, maar ons het gehoor gegee en die sekretaris-generaal by die lughawe ontmoet,” het Cele gesê.

Valcke was volgens hom byna in trane oor die druk op hom om die toernooi van Suid-Afrika te onttrek weens die aanval in Angola. Die polisie het volgens hom onderneem om die veiligheidsgereedheid vir die toernooi aan te spreek.

’n Reeks vergaderings is in Maart in Europa gehou waar die meeste deelnemende lande en 50 media-instellings verteenwoordig is. Ná twee dae se voorleggings was daar volgens Cele nie meer vrae oor veiligheid nie.

“Die laaste keer dat ek gehuil het, was twee jaar gelede met die dood van ’n goeie vriend,” het Valcke Vrydag in reaksie gesê. Hy het ontken dat Fifa dit ooit oorweeg het om die toernooi weens veiligheidsvrese uit Suid-Afrika te verskuif.

“Ek het ’n vergadering aangevra omdat daar kwessies was. Ek het gesê ons moet óf saamwerk óf mekaar beveg,” het Valcke gesê.
“Cele het ’n groot fout gemaak en wat hy gedoen het, is heeltemal verkeerd,” het hy gesê.

Jordaan het op ’n vraag gesê Suid-Afrika het al 147 keer sy veiligheidsplan tydens groot byeenkomste beproef en het ’n rekord van “100% veiligheid”. “Sekerheid is egter nie iets wat staties bly nie en ons sal steun op intelligensie en ons prosedures voortdurend hersien.”

Hy het gesê ’n hoë vlak van vliegveiligheid word gehandhaaf en iets soos busongelukke gebeur soms maande lank nie en dan is daar ’n paar in een week.

In antwoord op ’n vraag het hy gesê die aanvalle op die snelbusdiens in Johannesburg was beperk tot een plek in Soweto en is nie ’n algemene probleem nie.

- Rapport