Fifa spreek Blatter vry
2011-05-29 21:07
Zurich – Die etiese komitee van Fifa het 'n voormalige kandidaat vir presidentskap, Mohamed bin Hammam, en die adjunkpresident Jack Warner Sondag geskors, terwyl die president, Sepp Blatter, vrygespreek is van korrupsie.
Die komitee, waarvan die Namibiër Petrus Damaseb die voorsitter is, het bin Hammam, Warner en Blatter verhoor in ‘n dramatiese dag, waarin bin Hammam onttrek het uit die presidensiële verkiesing. Hy was Blatter se enigste teenstander.
Die verkiesing sal egter, soos beplan, op 1 Junie voortgaan, het die sekretaris-generaal van Fifa, Jerome Valcke, aangekondig nadat die komitee hul bevindinge bekend gemaak het.
“Beide bin Hammam en Warner is voorlopig geskors uit toekomstige aktiwiteit in sokker, terwyl ‘n volledige ondersoek uitgevoer word,” het Damaseb aangekondig.
“Só kan hulle nie dié wat hulle beskuldig het, konfronteer nie. Dit is om te verseker dat die ondersoek nie gekompromeer word nie.”
Bin Hammam, Warner en twee beamptes van die Karibbiese Sokkerunie (CFU) is voor die etiese komitee geroep om te antwoord op aanklagte van korrupsie. Die twee CFU-beamptes het egter nie verskyn nie, ondanks die feit dat Fifa aangebied het om hul reiskostes te betaal.
Bin Hammam en Warner is geteiken nadat Chuck Blazer, algemene sekretaris van die sokkerliggaam Concacaf, moontlike wanoptrede tydens ‘n vergadering in Trinidad op 10 en 11 Mei in Trinidad gerapporteer het.
Bin Hammam en Warner word daarvan beskuldig dat hulle $40 000 (sowat R277 000) se geskenke as vergoeding aangebied het vir nasionale verenigings om vir hulle te stem in die presidensiële verkiesing.
Blatter (75) is voor die komitee geroep om te antwoord op aantygings dat Warner hom reeds vooraf van beweerde betalings by dié vergadering vertel het.
Blatter het dit ten sterkste ontken.
- Volg Nuus24 op Twitter
- AFP