Fifa-gate: Laat vaar verkiesing, eis politici
2011-06-01 09:14
Johannesburg - Die strop om die nek van wêreldsokker se beleërde grootbaas, Sepp Blatter, het Dinsdag nóg stywer getrek.
Verskeie sokkerverenigings, politici én vooraanstaande borge het daarop aangedring dat Woensdag se presidentsverkiesing van Fifa, die sport se beheerliggaam, uitgestel en ’n onafhanklike ondersoek gelas word na die rits bewerings van korrupsie teen Blatter en van sy uitvoerende raadslede.
Dié 75-jarige Switser staan Woensdag straks wéér onbestrede om die presidentskap, nadat Mohamed bin Hammam hom die naweek as sy enigste teenstander onttrek het te midde van aantygings van omkopery teen hom.
Bin Hammam en Jack Warner, Fifa se vise-president, is dieselfde dag deur Fifa se etiek-komitee geskors nadat hulle in April glo lede van die Karibiese Sokkervereniging betaal het om vir dié Katar-boorling te stem.
Warner het Maandag ’n storm ontketen deur Blatter daarvan te beskuldig dat hy verlede maand $1 miljoen (sowat R7 miljoen) vir stemme betaal het en hy het ook onthul dat Jérôme Valcke, Fifa se sekretaris-generaal, onlangs in ’n e-pos aangevoer het dat Katar die Wêreldbeker-toernooi in 2022 “gekoop” het.
Blatter het Maandag, op ’n bisarre mediakonferensie in Zürich, volgehou dat daar geen krisis is nie.
“Dis bloot ’n bietjie moeilikheid wat ons binne ons gesin sal uitpluis,” is al wat Blatter oor die bewerings teen hom wou sê.
* Die Engelse én Skotse sokkerverenigings het Dinsdag gesê dié verkiesing “sal geen geloofwaardigheid hê nie,” terwyl verskeie politieke leiers en teenkorrupsie-waghonde ook ’n pleidooi gelewer het om dit uit te stel.
* Transparency International en die Europese Unie (EU) is maar twee van die organisasies wat aandring op ’n onafhanklike ondersoek na Blatter – wat reeds die afgelope 13 jaar president is en vandag vir ’n ongekende vierde termyn herverkies kan word.
* Die Australiese regering dring steeds aan dat die sowat R350 miljoen wat hy bestee het aan sy mislukte bod om die Wêreldbeker-toernooi in 2018 aan te bied, deur Fifa terugbetaal word.
* Verskeie van dié beheerliggaam se grootste borge – onder wie Emirates, Coca-Cola, Visa en Adidas – het ook hul “teleurstelling en groot kommer” uitgespreek.
Vir die jongste sportnuus volg Nuus24Sport op Twitter.
- Sapa - AP