Fifa bestry wedstrydknoeiery met R192m
2011-05-09 18:53
Zurich - Fifa het beloof om 20 miljoen Euro (sowat R192 miljoen) te spandeer en nouer bande met Interpol te vorm om toe te slaan op wedstrydknoeiery in sokker en bedrog in weddenskappe.
Sepp Blatter, Fifa-president, het gesê die liggaam sal anti-korrupsie-programme stig wat 10 jaar lank spelers, skeidsregters en beamptes sal opvoed.
Die projek sal vanuit Interpol se basis in Singapoer bestuur word.
Fifa glo wedstrydknoeiers met verbintenisse in Singapoer het onlangse internasionale wedstryde gereël bloot ten gunste van weddenskap-verneukery.
Leiers van Fifa en Interpol het die ooreenkoms onderteken nadat daar met speurders wat ondersoeke in Finland en Duitsland lei, vergader is.
Fifa en Interpol sê egter hulle het beperkte magte om ondersoek in te stel en moet op regerings en wetstoepassers staatmaak om sake op te los.
- Volg Nuus24 op Twitter
- Sapa - AP