Ferguson: Tevez nie €25 miljoen werd
2009-07-21 08:49
Kuala Lumpur – Sir Alex Ferguson, Manchester United se afrigter, meen die Argentynse doelskopper Carlos Tevez is nie die €25 miljoen (sowat R280 miljoen) werd wat Manchester City vir hom betaal het nie.
“In my opinie is hy nie €25 miljoen werd nie. Hy was gewild by die ondersteuners. Ondersteuners het hul helde en ek was meer as bereid om ‘n goeie aanbod te maak, maar hy is eenvodig nie soveel geld werd nie,” het Ferguson gesê.
Manchester United toer tans in Asië.
Die 25-jarige ster het verlede week ‘n vyfjaar kontrak met Manchester City geteken nadat sy kontrak met Manchester United verstryk het.
Tevez beweer Ferguson het hom nooit probeer oorreed om by Manchester United te bly nie.
Ferguson ontken egter dié bewerings ten sterkste.
“Ons het hom gekontak en talle boodskappe gestuur terwyl hy in Argentinië was. Ons uitvoerende hoof het ‘n aanbod aan sy agent gemaak, maar hy het nooit reageer nie.”
Ferguson het intussen vir Michael Owen as plaasvervanger gekry.
AFP